🔳 മൃതദേഹങ്ങളുടെ മുറി 🔳

സെഹ്റാൻ

തെരുവിൽ നിന്നെനിക്കൊരു
പൂച്ചയുടെ മൃതദേഹം കിട്ടി.
അതിനുമുൻപൊരു നായയുടേതായിരുന്നു.
അതിനുമുൻപൊരു ഓന്തിന്റെ.
അതിനുമുൻപൊരു എലിയുടെ.
അതിനുമുൻപൊരു പന്നിയുടെ.
അതിനുമുൻപൊരു കാളയുടെ.
അതിനുമുൻപൊരു…
അതിനുമുൻപൊരു…
നോക്കൂ, എന്റെ മുറിയാകെ
അഴുകിയ മൃതദേഹങ്ങളും,
അവയുടെ രൂക്ഷദുർഗന്ധവും,
നുരയ്ക്കുന്ന പുഴുക്കളും…
കണ്ടോ, ഇന്നലെ രാത്രിയാണയാൾ
ഇവിടേക്ക് കടന്നുവന്നത്.
ശിരസ്സിലേക്ക് തിരിഞ്ഞിരിക്കുന്ന
നിറതോക്കിന്റെ ഗൂഢമൗനം പോൽ
നിശബ്ദത പേറുന്നൊരാൾ!
നനഞ്ഞ മണ്ണിലേക്ക്
പരുഷമായ വേരുകൾ പടർത്തുന്ന
വൃക്ഷം പോൽ അപ്രതീക്ഷിതമായ്…
രാത്രി മുഴുവൻ അതികഠിനമാം
വണ്ണം അയാളെന്നെ ഭോഗിക്കുകയായിരുന്നെന്ന് പറഞ്ഞാൽ നിങ്ങൾ വിശ്വസിക്കുമോ?
മുറിഞ്ഞടർന്ന എന്റെ മുലക്കണ്ണുകളും,
കീറിപ്പിളർന്ന യോനീകവാടവും,
കടിച്ചുപറിക്കപ്പെട്ട അധരങ്ങളും,
ഉടലാകമാനമുള്ള നഖമുറിവുകളും
അതിന്റെ തെളിവല്ലെങ്കിൽ
മറ്റെന്താണ്…?
എന്നിട്ടയാളെവിടെയെന്നോ?
ഈ അഴുകിയ മൃതദേഹങ്ങൾക്കിടയിൽ
നിങ്ങളയാളെ കാണുന്നില്ലേ?
നാക്ക്‌ കടിച്ച്…
കണ്ണുകൾ തുറിച്ച്…
തലപിളർന്ന്…
കണ്ടില്ലേ? പുഴുക്കളയാളുടെ
മാംസം കാർന്നുതുടങ്ങിയിട്ടുണ്ട്.
വരൂ, ഇനിയൊന്ന് പുറത്തേക്ക് നടക്കാം.
ഉദ്യാനത്തിന്റെ തെക്കേയറ്റത്തെ
പുൽത്തകിടിയിൽ മേഞ്ഞുകൊണ്ടിരിക്കുന്ന
ചെമ്പൻ കുതിരയെ കാണാമോ?
നഗരത്തിൽ തലയുയർത്തി നിൽക്കുന്ന രണ്ടു കെട്ടിടങ്ങളെ
തിന്നുതീർത്തത് അവനായിരുന്നു.
നിമിഷനേരം കൊണ്ട്!
ദാ, മഴ പെയ്തു തുടങ്ങിയല്ലോ.
രേതസ്സു പോലെ കൊഴുത്ത മഴവെള്ളം!
വിശപ്പാറിയ കുതിരയിപ്പോൾ
പുൽത്തകിടിയിൽ മയങ്ങാൻ തുടങ്ങുകയാണ്.
മഴവെള്ളക്കൊഴുപ്പിലവൻ
ഒരുപക്ഷേ മുങ്ങിപ്പോയേക്കാം.
ഓ! ഞാനകത്ത് പോട്ടെ.
മൃതദേഹങ്ങൾക്ക് ഏകാന്തത
സഹിക്കാൻ കഴിയില്ലയെന്ന്
അല്പനേരം മുൻപ് കൂടിയവ
പറഞ്ഞതാണ്…