💋 സദാചാരപാഠങ്ങളുടെ ചാരം! 💋

രചന : സെഹ്റാൻ*💋

ഞാനൊരു ഗാനമാലപിക്കുകയാണ്.
ബാത്റൂമിലെ മൂത്രത്തോടൊപ്പം
മഞ്ഞകലർന്ന് അത്
സ്വീകരണമുറിയിലേക്കൊഴുകുന്നു.

പൊടുന്നനെ,
ജാലകത്തിലൂടെ പറന്നെത്തിയ
വളഞ്ഞുകൂർത്ത നഖങ്ങളും,
വീതിയേറിയ ചിറകുകളുമുള്ള
കാക്കകൾ എന്നെ പുറത്തേക്ക്
കൊത്തിവലിക്കാൻ തുടങ്ങുന്നു.

പാറപ്പുറത്തെ വെയിലിൽ ഞാൻ
തലച്ചോറിന് തീകൊളുത്തി
നീലപ്പുകവളയങ്ങൾ തീർക്കുന്നു.
നഗരത്തിലെ ഇരുണ്ട മദ്യശാലയിൽ
ലഹരിയുടെ ചില്ലുഗ്ലാസിലേക്ക്
കൂപ്പുകുത്തുന്നു.

ഇടുങ്ങിയ ലോഡ്ജ്മുറിയിൽ
മദ്യത്തിന്റെ നിറമുള്ളൊരു
ഗണികയുടെ നഗ്നമേനി
നക്കിത്തോർത്തുന്നു.
അവളുടെ മുതുക് പോലെ
പരന്നുകിടക്കുന്നൊരു മൈതാനത്ത്
ആൾക്കൂട്ടമൊരു യുവതിയെ
വിചാരണ ചെയ്യുന്നു.

പാപം ചെയ്യാത്തവരിവളെ
കല്ലെറിയട്ടെയെന്ന് സംഘത്തലവൻ
നിസംഗനാവുന്നു.
ഏറ്റവും വലിപ്പമുള്ളൊരു
കല്ലിനായെന്റെ കൈ പരതുന്നു…

പാറപ്പുറത്തെ വെയിലിൽ
നഗ്നനായ് ഞാൻ.
എന്റെ ദേഹമാകെ
കത്തിത്തീർന്ന വേദപുസ്തകത്തിലെ
സദാചാരപാഠങ്ങളുടെ ചാരം തീർത്ത
വിലക്ഷണങ്ങളായ വൃത്തങ്ങൾ…