🥃 ‘മദ്യ’മേഖലകൾ 🥃

രചന : സെഹ്‌റാൻ*

തലയോട്ടിയുടെ പിറകിലൊരു
സുഷിരമുണ്ട്.
അസ്വസ്ഥതയുടെ
വിത്തുകളൊക്കെ
അതിനകത്താണ്
പാകിയിരിക്കുന്നത്.
മുളപൊട്ടുമ്പോൾ
വലിയ ചൊറിച്ചിലാണ്.
അസഹ്യം!
നിരത്തുകൾ വിണ്ടുകീറിക്കാണിക്കും.
ആകാശം പൊട്ടിയടർന്ന് കാണിക്കും.
മരങ്ങൾ ശിഖരങ്ങളടർത്തിക്കാണിക്കും.
കാറ്റ് മുടിയഴിച്ചിട്ട് കാണിക്കും.
ശൂന്യതയിലേക്ക് കൊളുത്തിയിട്ടിരിക്കുന്നൊരു
കയറേണിയിലേക്ക്
കാലെടുത്തു വെച്ച്
കാടുകയറാൻ തുടങ്ങുന്ന
ചിന്തകൾക്ക് മേൽ
ഞാനപ്പോൾ മദ്യം പകരും.
നുരയ്ക്കുന്ന
മദ്യത്തിനുമേൽ
ചതുരാകൃതിയാർന്നൊരു
ഐസുകട്ട കണക്കേ
പൊങ്ങിക്കിടക്കും.