🔶 വഴികാട്ടി 🔶

രചന : സെഹ്റാൻ ✍

ജീർണിച്ച തുറമുഖത്തിന്റെ
ദ്രവിച്ച കൈവരിയിലിരുന്ന്
കടലിന്റെ ദൂരമളക്കേ
അയാളെക്കണ്ടു.
നഷ്ടപ്പെട്ട കൈപ്പത്തിയിലെ
സർപ്പാകൃതിയുള്ള
സ്വർണമോതിരങ്ങൾ
തിരഞ്ഞ് പുറപ്പെട്ടതാണയാൾ.
സെഹ്റാൻ എന്ന് പേര്.

“നോക്കൂ സെഹ്റാൻ,
ഈ കപ്പലിൽ നിങ്ങൾക്ക്
കടൽ താണ്ടാം.”
(കപ്പൽപ്പായകൾ പഴകിക്കീറിപ്പോകാതെയും,
കപ്പൽപ്പലകകൾ ദ്രവിച്ചിളകിപ്പോകാതെയും
മറുകരയെത്താമെന്ന് ഉറപ്പുണ്ടെങ്കിൽ…)

തങ്ങളുടെ നിറം കറുപ്പോ, വെളുപ്പോ
എന്നതുചൊല്ലി സദാ തർക്കിച്ചു
കൊണ്ടിരുന്ന രണ്ടു കാക്കകളെ
ഞാനയാൾക്ക് കാണിച്ചു.
“ഇവരുമുണ്ടാകും കപ്പലിൽ
നിങ്ങളോടൊപ്പം…”

ദ്വീപിലെ അഭയാർത്ഥികളുടെ
മസ്തിഷ്കങ്ങൾ രുചിക്കാൻ
പോകുന്ന രണ്ട് കടുവകളെ കാണിച്ചു.
“ഇവരുമുണ്ടാകും നിങ്ങളോടൊപ്പം…”

നാടുകടത്തപ്പെട്ട ഭരണാധിപനെ
ഞാനയാൾക്ക് കാണിച്ചു.
(ഏകാധിപത്യത്തിന്റെ പുഴുക്കൾ
നുരച്ചിരുന്ന തലച്ചോറിന്റെ
സിംഹഭാഗവും ഇപ്പോഴുമയാളുടെ
ശിരസ്സിൽ…!!)

“ഇയാളുമുണ്ടാകും നിങ്ങളോടൊപ്പം.
പുറപ്പെടൂ സെഹ്റാൻ…”
(അയാളുടെയും, ഏകാധിപതിയുടെയും
മറഞ്ഞിരിക്കുന്ന മസ്തിഷ്കങ്ങൾ
നോക്കി കൊതിനുണയുന്ന കടുവകളുടെ
വിശന്ന കണ്ണുകളെനിക്ക് കാണാം.)

കപ്പൽ കാഴ്ചയിൽ നിന്നും
മറയുമ്പോൾ മണലിൽ കുഴിച്ചിട്ട
സെഹ്റാന്റെ ദ്രവിച്ച കൈപ്പടത്തിലെ
സർപ്പാകൃതിയുള്ള മോതിരങ്ങളൂരി
കടലിലെറിഞ്ഞ്
ജീർണിച്ച തുറമുഖത്തിന്റെ
ദ്രവിച്ച കൈവരിയിലിരുന്ന് ഞാൻ
തിരകളെണ്ണാൻ തുടങ്ങുന്നു.

ഒന്ന്…
രണ്ട്…
മൂന്ന്…
നാല്…
🌗🌗🌗