രചന : എൽദോ മാമ്മലശ്ശേരി✍
ബിഷപ്പ്‌ സ്യൂട്ട്
പണിയാന്‍
“പത്തു ലക്ഷം”
പള്ളിയില്‍ നിന്ന് നിങ്ങള്‍
സംഭാവന തരണം
വല്യ മെത്രാന്റെ ഈ
കുഞ്ഞു ആവശ്യം കേട്ട്
കുരിശില്‍ കിടന്ന
ക്രിസ്തുദേവന്
ചിരിപൊട്ടി..
ഞാന്‍ ചിരിച്ചില്ല
പള്ളി വിലക്കും.
കണ്ണടച്ച് കാണിച്ചു..
‘ചിരിക്കാതിരിക്ക്
മനുഷ്യാ ..’
‘വീഡി ഉണ്ടോ സഖാവേ
തീപ്പെട്ടി എടുക്കാന്‍’
എന്ന ട്യൂണില്‍
“ചാട്ടവാറുണ്ടോ
ചെറുക്കാ ??
എന്നെന്നോടൊരു ചോദ്യം ..
ഇത്തവണ
ഞാന്‍ ചിരിച്ചു
‘കള്ളും ,കപ്പയും, ബീഫും
തട്ടുന്ന കുഞ്ഞാടുകള്‍ക്ക്
ചാട്ടവാര്‍ എന്താകാന്‍
മിനിമം ഒരു
തോക്കെങ്കിലും വേണ്ടേ കര്‍ത്താവേ’
എന്ന് തിരിച്ചടിച്ചു .
ആണി ഊരി പോക്കറ്റില്‍ ഇട്ട്
എന്നെ വിളിച്ചു
‘വാടാ ചെറുക്കാ ‘
ഞങ്ങള്‍ ബെതലഹേമിലേക്ക്
പോയി,
ക്രിസ്തുദേവന്
പുല്‍ക്കൂട്ടില്‍ കാലികള്‍ക്കിടയില്‍
കിടന്നു
എന്നിട്ട്
ദയാഭായിയുടെ ആത്മകഥ
വായിക്കാന്‍ തന്നു..
ഞാന്‍ ഉറക്കെ വായിക്കാന്‍ തുടങ്ങി
ഹാ , അവന്‍ നെടുവീര്‍പ്പിട്ടു ..
വായനക്കിടയില്‍
പെട്ടെന്ന്
നിര്‍ത്താന്‍ പറഞ്ഞു..
എടാ ചെറുക്കാ അത് ഒന്നൂടെ വായിച്ചേ
“മനുഷ്യനായി പിറന്നവനെ
തിരയേണ്ടതും മനുഷ്യരുടെ
ഇടയിലാണ് ”
അവന്റെ കണ്ണ് നിറഞ്ഞു …
ഞാന്‍ സലോമിയുടെ കാര്യം പറഞ്ഞു
നീ ഇതൊന്നും കാണുന്നില്ലേ
എന്ന് ചോദിച്ചു ?
അവന്‍ പറഞ്ഞു
എടാ,
വിശന്നപ്പോള്‍,
അവള്‍
കരഞ്ഞപ്പോള്‍ ,
തൂങ്ങി മരിച്ചാല്‍
തെമ്മാടിക്കുഴി വഴി
സ്വര്‍ഗത്തിലേക്ക് ഒരു
ഊടുവഴി ഉണ്ടെന്ന്
അവളോട്‌ കള്ളം
പറഞ്ഞതു ഞാനാണ് …
(വക്കനാൽ)