🦑വന്നെത്തും സ്വപ്നങ്ങളേ🥀

രചന : കൃഷ്ണമോഹൻ കെ പി ✍

നാണത്തിൻമാറാപ്പു തോളത്തു പേറിയാ
നാളീകം മെല്ലെക്കുനിഞ്ഞു നില്ക്കേ
ചേലൊത്ത ശ്രീകരൻചാലേ യുദിച്ചിട്ടാ
പേലവമൊട്ടിനെയൊന്നുഴിഞ്ഞൂ

പ്രാഭവം പൂണ്ടവൾ മെല്ലെ മിഴി തുറ-
ന്നാമോദമോടെയിതൾ വിടർത്തീ
സാനന്ദമാപ്പൂവിൽ, താനേ മയങ്ങിയ
കാമുകൻ വണ്ടും പറന്നുയർന്നൂ

കോകിലമാനന്ദവീചിയിൽ പാടിയും
കേകികൾ നർത്തനം ചെയ്തിട്ടുമാ
ഭാവനാ ലോകത്തിൻ തങ്ക പ്രതീക്ഷ തൻ
വേദിയെയാകെയലങ്കരിച്ചൂ

കാലിക വൃത്തികൾ കണ്മുന്നിലെത്തിയ
കാമ്യർ കവികൾ മിഴി തുറന്നൂ
വേപഥുവില്ലാത്ത നാളെയേ കാണുവാൻ
വേണ്ടുന്ന, പോലെ വരി കുറിച്ചൂ

വേദാന്ത സാരങ്ങളുൾക്കൊണ്ടു മാനുഷർ
വേണ്ടാത്ത ചിന്തകളാകെ മാറ്റാൻ
ഈടുറ്റ വാക്യശരങ്ങളുമായവർ
ഈണം തുളുമ്പുന്ന കാവ്യമോതീ

സാഗരം തന്നുടെ നീളും തിരകളാൽ
ഭൂമിയെപ്പയ്യെ ത്തലോടിടുമ്പോൾ
മാരുത സ്പർശനമേറ്റ തരുക്കളും
ചാരുതയാർന്ന നടനമാടീ

ഈ വിധം സൗഭഗ സുപ്രഭാതത്തിനെ
ഈ ലോകം കണ്ടു ചിരിച്ചിടുമ്പോൾ
ഈഷലില്ലാത്തയാ പ്രത്യുഷ ഭംഗിയിൽ
ഊഷ്മള ചിത്തരായ് മാറി ലോകർ💃🏽