💠കുന്നിൻമുകളിലെ കഴുകൻമാർ💠

രചന : സെഹ്റാൻ🌿✍

കുന്നിൻമുകളിലെ കഴുകൻമാരെ
കാണുന്നുവോ?
അവ നിങ്ങളുടെ കരൾ
കൊത്തിപ്പറിക്കും.
കണ്ണുകൾ ചൂഴ്ന്നെടുക്കും.
ദിനരാത്രങ്ങളുടെ ഇരുണ്ട
ശൂന്യതയിലേക്ക്
വേദഗ്രന്ഥങ്ങളിലെ യുദ്ധകാഹളങ്ങളെ
ഒഴുക്കിവിടുകയാണോ നിങ്ങൾ…?
ആദ്യം തന്നെയത് മടക്കിവെക്കൂ…
തെരുവുവിപ്ലവങ്ങളിൽ
പങ്കെടുക്കുന്നവരെ കണ്ടോ നിങ്ങൾ?
എത്ര ഊർജ്ജസ്വലർ!
എന്നാൽ കറുത്തുവിറങ്ങലിച്ച
രാത്രികളിലവർ തങ്ങളുടെ
വിഷാദരോഗത്തിന്റെ വേരുകളിൽ
വെള്ളം പകരുന്നു.
കുഴിമാടങ്ങളോട് പ്രഭാഷണമരുത്.
മരണമൊരു നുറുമ്പിച്ച എല്ലിൻകഷണമായ് നിങ്ങളുടെ
തൊണ്ടയിൽ കുരുങ്ങിക്കിടന്നേക്കാം.
ചിതൽപ്പുറ്റുകൾ
തലയെടുത്ത് നിൽക്കുന്ന തത്വചിന്തകളുടെ ഭാണ്ഡവും പേറി
നിങ്ങളാ കുന്നിൻപുറത്ത് പോകരുത്.
ചിറകുവിരുത്തുന്ന കഴുകൻമാരെ
നിങ്ങൾ കാണുന്നില്ലേ?
അവ നിങ്ങളുടെ കരൾ
കൊത്തിപ്പറിക്കും.
കണ്ണുകൾ ചൂഴ്ന്നെടുക്കും.
വിശപ്പാറുമ്പോൾ
ചിലമ്പിച്ച ശബ്ദത്തിൽ
ശാന്തിഗീതങ്ങളാലപിക്കും!
🔘