🎻സ്വാന്തനം തേടുമ്പോൾ🎻

രചന : കൃഷ്ണമോഹൻ കെ പി ✍

ആടിത്തിമിർക്കുന്ന വേദനാവ്യൂഹത്തിൻ
ആകെത്തുകയാകും ജീവിതത്തെ
ആകുന്ന പോലൊക്കെ മാറ്റിമറിക്കുവാൻ
ആരാലുമൊന്നു കൊതിച്ചു പോകും
ആണായ് പിറന്നവൻ ജീവിതഭാരത്തെ
ആകെയും തന്റെ ചുമലിലേറ്റി
ആശച്ചിറകേറി ആകാശസാനുവിൽ
ആറാടും ചക്രവാളത്തെ നോക്കി
ആശ്വാസം തേടി പറക്കാൻശ്രമിക്കുമ്പോൾ
ആർക്കെല്ലാം കിട്ടുമോ സാന്ത്വനങ്ങൾ ?!
ഇതളറ്റ പൂവിന്റെ കദനത്തിൻ നേർ കഥ
ഇവിടെയീ കാറ്റിൽ പരന്നിടുമ്പോൾ
ഇതളിട്ട മോഹങ്ങൾ വാടിക്കൊഴിഞ്ഞവൾ
ഇവിടെയീ മണ്ണിൽ പതിച്ചിടുമ്പോൾ
കടലിന്റെ കൈകളാം തിരകൾ വന്നവളുടെ
കരയിലെ കാല്പാടു മെല്ലെ മെല്ലെ
തഴുകിത്തലോടുകയല്ലയോസാഗരം
അവളൊപ്പം കേഴുകയല്ലേ?!
ഉത്തരം കിട്ടാത്ത ചോദ്യമായെന്നുടെ
ഭഗ്ന സ്വപ്നങ്ങൾ മയങ്ങി നില്ക്കേ
ഇത്തരം വാക്യാമൃതങ്ങൾ കൊണ്ടെന്നുടെ
ചിത്തത്തിലാന്ദോളനങ്ങൾ തീർക്കും
പുത്തൻ കവിതതൻ മുഗ്ദ്ധസൗന്ദര്യം ഞാൻ
ഇത്തിരി നേരം നുകർന്നു പോയീ🐟🐠