💧ശ്രാവണപ്പുലരിയിൽ💦

രചന : കൃഷ്ണ മോഹനൻ കെ പി ✍

മേലേ പറക്കുന്ന മേഘങ്ങൾ തന്നുടെ
മേനിയിൽ നിന്നുള്ള സ്വേദബിന്ദു
മാറത്തു വന്നു മഴയായ്പതിക്കുമ്പോൾ
മേദിനിക്കുള്ളം കുളിർത്തു പോയീ

ശ്രാവണമാസത്തിന്നാദ്യദിനത്തിലീ
ശ്രാവ്യസുധ തൂകും മാരി തൻ്റെ
ശീതള സ്പർശത്താൽ മാനവർക്കൊക്കെയും
ശാന്തത കൈവന്നു ധന്യരായീ

ചേലൊത്ത ശീലുകൾ രാമായണത്തിൻ്റെ
ചാരുതയോടേ മനസ്സിലെത്തീ
ചാമരം വീശുന്ന മാമരക്കൂട്ടങ്ങൾ
ചാരത്തു നിന്നങ്ങു നൃത്തമാടീ

ആവണിത്തെന്നൽ വന്നാശകൾ തന്നുടെ
ആരാമവാടം തുറന്നപോലേ
ആയിരം നാവുകൾ ആമോദമോടൊരു
ആനന്ദഗീതം പകർന്ന പോലേ

ഉൾത്താരിലുൾക്കൊണ്ട കല്മഷമൊക്കെയും
ഉത്തമർ മെല്ലെക്കഴുകി നീക്കും
ഉന്മാദവേളയായ് ശ്രാവണപ്പൂമുഖം
ഉത്സവമുറ്റമായ് മാറിടുന്നൂ

ഇക്കണ്ട കാഴ്ചകൾ മാനസതാരിലെ
ഇന്ദീവരങ്ങൾ വിടർത്തിടുമ്പോൾ
ഇല്ലോകവാസികളാനന്ദമൂർഛയിൽ
ഇത്തിരി നേരം ലയിച്ചു പോയീ

രാക്കിളിപ്പാട്ടിൻ്റെ രാഗങ്ങൾ തന്നിലീ
രാമായണക്കാറ്റു വീശിടുമ്പോൾ
രാഗാർദ്ര ലോലയാം രാകാശശിമുഖി
രാമഴ തന്നിൽക്കുളിച്ചു തോർത്തീ☂️