രചന : ശ്രീകുമാർ എം പി✍
“ചന്നം ചിന്നം” പെയ്തീടുന്ന
കൊച്ചുകുറുമ്പാ മഴയെ
ഇന്നെന്റെ കുഞ്ഞിൻ തലയിൽ
നിന്റെ കുറുമ്പു കാട്ടേണ്ട
തുള്ളിത്തുള്ളി നീ പെയ്തോണ്ട്
തള്ളിക്കയറാൻ നോക്കേണ്ട
കൈയ്യിലെ വെള്ളം കൊണ്ടെന്റെ
കുഞ്ഞിൻമേനി നനയ്ക്കേണ്ട
കുട്ടിക്കളിയ്ക്കു നില്ക്കേണ്ട
തൊട്ടുകളിയ്ക്കാൻ നോക്കേണ്ട
കുഞ്ഞിനു ദീനമേകീടാൻ
ഒട്ടും നിനക്കു കിട്ടൂല്ല
കുറുമ്പു തീരെ കാട്ടാതെ
ദൂരെ നിന്നു കളിച്ചോളൂ
തുള്ളിത്തുള്ളി തളരുമ്പോൾ
മെല്ലെപ്പോയി കിടന്നോളൂ.
