🌷 സ്വാതന്ത്ര്യത്തിന്റെ
ഏഴര പതിറ്റാണ്ടുകൾ🌷

രചന : ബേബി മാത്യു അടിമാലി✍

75-ന്റെ നിറവിൽ സ്വതന്ത്ര ഭാരതത്തിന്റെ അമൃത മഹോത്സവം ആഘോഷിക്കുമ്പോൾ ഭാരതത്തിന്റെ ചിറകുകൾ സ്വാഭിമാനത്തോടെ ലോക രാഷ്ട്രങ്ങളുടെ ഇടയിൽ ഉയരങ്ങളിലേക്ക് ഉയരുമ്പോൾ അഭിമാനം കൊള്ളാത്ത ഭാരതീയനുണ്ടാവുകയില്ല . ആത്മാഭിമാനത്തോടെ ഏതൊരു ഭാരതീയനും തലയുയർത്തി നിൽക്കുവാൻ കഴിയുന്ന ഒരു നിമിഷമാണ് സമാഗതമായിരിക്കുന്നത്.
75 വർഷങ്ങൾക്കു മുൻപേ 1947 ആഗസ്റ്റ് 15-ന് അർദ്ധരാത്രിയിൽ ഡെൽഹിയിലെ റെഡ് ഫോർട്ടിനു മുൻപിൽ പണ്ഡിറ്റ് ജവാഹർലാൽ നെഹ്റു ഉയർത്തിയ അശോക ചക്രമേറിയ ത്രിവർണ്ണ പതാകപാറിപറന്നപ്പോൾ പുളകം കൊള്ളാത്ത ഒരു ഭാരതീയൻ പോലും ഉണ്ടാകില്ല.

ആയിരങ്ങൾ ജീവൻ നൽകി , അടിയുടെ , ഇടിയുടെ , വെടിയുടെ , പട്ടാള ബയണറ്റുകളുടെ കുന്തമുനകൾ തുളച്ചു കയറിയ രക്തത്തിലൂടെ, ജയിലറകളിൽ അടച്ചു പൂട്ടപ്പെട്ട ആയിരങ്ങളുടെ രോദനത്തിന്റെ ആർത്തു വിളിക്കപ്പെട്ട ആഗ്രഹങ്ങളുടെയും മോഹങ്ങളുടെയും ത്യഗത്തിന്റെയും കർമ്മ ഫലമായി നേടിയെടുത്ത സ്വാതന്ത്ര്യത്തിന്റെ വെള്ളി കതിരുകൾ ഓരോ ഭാരതീയനേയും പുൽകിയ നിമിഷങ്ങളുടെ ജന്മദിനം.

അഹിംസയിലൂടെയും മരണം വരെ നിരാഹാര സമരമെന്ന സ്വയം ശിക്ഷയിലൂടെയും ത്യാഗത്തിന്റെ വജ്രായുധവുമായി സൂര്യനസ്തമിക്കാത്ത സാമ്രാജിത്വ ശക്തിയായാ ബ്രിട്ടീഷ് ഭരണത്തെ കിഴ്പ്പെടുത്തിയ ആദർശത്തിന്റെയും ദാർശനികതയുടെയും ശിലാഫലകവുമായി ജീവൻ പകർന്ന , നമ്മുടെ സമര നായകൻ ബാപ്പുജി എന്ന മഹാത്മാ ഗാന്ധിയെ രാഷ്ട്ര പിതാവായി അവരോധിക്കപ്പെട്ടത് കേവലം സാന്ദർഭികം മാത്രമല്ല.
സ്വാതന്ത്ര്യ സമര ഭൂമിയിൽ എരിഞ്ഞടങ്ങിയ അനേകം സ്വാതന്ത്ര്യ പ്രേമികളുടെ ശാക്തീകരണം സാധ്യമാക്കാൻ ത്യാഗത്തിന്റെയും സഹനത്തിന്റെയും മാർഗ്ഗത്തിലൂടെ സ്വയം രക്തസാക്ഷിയായി , സ്വാതന്ത്ര്യം എന്ന പരമ ലക്ഷ്യം നേടിയെടുത്ത ഒരു യോദ്ധാവിന്റെ ശിരസിനെ അണിയിക്കാൻ അനുരൂപമായ തൂവൽ തൊപ്പിയായിരുന്നു അത് എന്നത് കൊണ്ടായിരുന്നു.

സ്വത്തും പണവും വിലപിടിപ്പുള്ള എല്ലാം ചൂഷണം ചെയ്ത ശേഷം ബ്രിട്ടീഷുകാർ അവഗണിച്ച് ചവറ്റു കൊട്ടയിൽ തള്ളിയ നമ്മുടെ രാജ്യം . രണ്ട് ലോക മഹായുദ്ധങ്ങൾ കവർന്നെടുത്ത് കാലിയായ രാജ്യം. കഠിനാദ്ധ്വാനത്തിലൂടെ വരണ്ട ഭൂമിയിൽ പൊന്നു വിളയിച്ച് എല്ലാ മേഖലകളിലും കഴിവുകൾ തെളിയിച്ച് ലോകത്തിന്റെ മുൻപിൽ ആത്മാഭിമാനത്തോടെ തല ഉയർത്തി നിൽക്കുന്ന കാഴ്ച . ലോകത്തിലെ ഏറ്റവും വലിയ ജനാധിപത്യ രാജ്യത്തെ പൗരൻമാരായ നമുക്ക് അഭിമാനകരമാണ്. ഈ നേട്ടങ്ങൾക്ക് കാരണം ഒരു ശക്തിക്കും അട്ടിമറിക്കാനാവാത്ത ഒരു ഭരണഘടന അതിന് പിൻബലമേകുന്നു എന്നതാണ്.

ഇനിയും നമുക്ക് ഒരു പാട് മുന്നേറാനുണ്ട്. ഇന്ത്യ എന്ന ആശയത്തിന് വലിയ സംഭാവന നൽകിയത് സ്വതന്ത്ര്യ സമര നേതാക്കളാണ്. ഇന്ത്യ എന്നും മതനിരപേക്ഷ രാഷ്രമായിരിക്കണമെന്നാണ് അവർ ആഗ്രഹിച്ചത്. സ്വാതന്ത്ര്യ സമരത്തിൽ വിവിധ ദേശിയതകളെ സംയോജിപ്പിക്കുകയായിരുന്നു ഈ നേതാക്കൾ ചെയ്തത്.
മതനിരപേക്ഷതയും ജനാധിപത്യവും കൂടുതൽ കരുത്തോടെ സംരക്ഷിക്കപ്പെടേണ്ടതുണ്ട്. വിഭവങ്ങളുടെ വിതരണം സമത്വ പൂർണ്ണം ആകേണ്ടതുണ്ട്. പട്ടിണിയും ദാരിദ്ര്യവും തുടച്ചു നീക്കപ്പെടേണ്ടതുണ്ട്. എല്ലാവർക്കും തല ചായ്ക്കാൻ വാസയോഗ്യമായ വീടുകൾ ലഭിക്കേണ്ടതുണ്ട്. സ്വാതന്ത്ര്യം സമത്വം സാഹോദര്യം ഇവ പറയാനുള്ള വെറും വാക്കുകളല്ലാ പ്രവർത്തിയാകണം എന്ന് തിരിച്ചറിയേണ്ടതുണ്ട്. വർദ്ധിച്ചു വരുന്ന അഴിമതിയും അന്യായമായ പ്രകൃതി ചൂഷണവും തടയേണ്ടതുണ്ട്. സ്ത്രി പീഠനവും ബാലവേലയും കർശനമായി അവസാനിപ്പിക്കേണ്ടതുണ്ട്. ഓരോ പൗരനും സ്വതന്ത്രവും നിർഭയവുമായി ഭരണഘടന നൽകുന്ന അവകാശങ്ങൾ അനുഭവിച്ച് ജീവിക്കുവാൻ കഴിയേണ്ടതുണ്ട്.

സമത്വ പൂർണ്ണമായ ഇന്ത്യക്കായി വർണ്ണ , വർഗ്ഗ ,ജാതി ,മത , ലിംഗ, ഭാഷാ വിത്യാസമില്ലാതെ ഓരോ ഭാരതീയനും കൈകോർത്ത് മുന്നേറാൻ കഴിയട്ടെ .
സ്വാതന്ത്ര്യത്തിന്റെ അമൃത മഹോത്സവത്തിൽ എല്ലാവർക്കും സ്നേഹപൂർവ്വം സ്വാതന്ത്ര്യദിനാശംസ ളോടെ
🌷 വന്ദേ മാതരം ….. ജയ് ഹിന്ദ്🌷