🌹 മരണാനന്തരം 🌹

രചന : സെഹ്റാൻ✍

➖➖⭕⭕➖➖
ശവപ്പെട്ടിയിലെ ആണികൾ
തുരുമ്പെടുക്കുകയും,
കുഴിമാടത്തിലെ പനിനീർച്ചെടികൾ
പൂവിടുകയും ചെയ്ത ഒരു പ്രഭാതത്തിൽ
അയാൾ നടക്കാനിറങ്ങുകയും,
വഴിതെറ്റി നഗരത്തിനോട് ചേർന്നുള്ള
തെരുവിൽ എത്തപ്പെടുകയും ചെയ്തു.
അവിടെ വെച്ചയാൾക്ക് ഒരപരിചിതനിൽ
നിന്നും വെടിയേൽക്കുകയും,
അയാൾ വീണ്ടും മരണപ്പെടുകയുമുണ്ടായി…
(അയാളുടെ നെഞ്ചിൽ നിന്നും ചിതറിവീണ
രക്തത്തുള്ളികൾക്കും, കുഴിമാടത്തിലെ പനിനീർപ്പൂക്കൾക്കും ഒരേനിറമായിരുന്നു.!!!)
അയാളുടെ മരണത്തിന് തൊട്ടുപിറകേ
അവിടെയൊരു കലാപം പൊട്ടിപ്പുറപ്പെടുകയും,
തെരുവ് പിളർന്ന് നഗരത്തിൽ നിന്നും
വേറിടുകയും ചെയ്തു….
മരണത്തിന് ദിവസങ്ങൾക്ക് ശേഷം
അയാൾ വീണ്ടും തെരുവിൽ വരുകയും,
‘നടത്തം എന്ന വ്യായാമം നിത്യജീവിതത്തെ
സ്വാധീനിക്കുന്നതെങ്ങനെ?
‘ എന്ന വിഷയത്തിൽ ഒരു പ്രഭാഷണം
നടത്തുകയും ചെയ്തു.
(ആ സമയം തെരുവ് തീർത്തും വിജനമായിരുന്നു. തെരുവിൽ നിന്നും വേറിട്ട്
പോയ; നഗരത്തിലെ പുകയേറ്റ് മങ്ങിയ കെട്ടിടങ്ങളപ്പോൾ പ്രഭാഷകനെ തുറിച്ച് നോക്കുകയുണ്ടായി…)
പ്രഭാഷണത്തിനിടെ പെട്ടെന്നയാൾക്ക്
പനിനീർച്ചെടികളുടെ ഓർമ്മ വരുകയും
ധൃതിയിലയാൾ കുഴിമാടത്തിലേക്ക്
മടങ്ങുകയും ചെയ്തു.
ഓരോ ക്ലാവ് പിടിച്ച വൈകുന്നേരങ്ങളും
വിളറിനരച്ച പുലരികളെയാണല്ലോ
പ്രതീക്ഷിക്കുന്നതെന്നയാൾ നടത്തത്തിനിടെ
വെറുതെ ചിന്തിക്കുകയുണ്ടായി.
ഉപ്പൂറ്റിക്കുള്ളിൽ നിന്നും
കാലുകളും, കണ്ണുകളുമില്ലാത്തൊരു
പക്ഷി നഗരത്തിലെ
പഴകിയ കെട്ടിടത്തിന് മേൽ
ചേക്കേറാൻ പുറപ്പെടുന്നത്
അപ്പോഴയാൾ
വിസ്മയങ്ങളൊന്നും കൂടാതെ
കണ്ടുനിന്നു!!