🌷 ഓണ ദിനങ്ങൾ🌷

ലേഖനം : ബേബി മാത്യു അടിമാലി✍

കേരളീയരുടെ മഹോത്സവമായ ഓണത്തിന് ഇനി ദിവസങ്ങൾ മാത്രം. ലോകത്തിന്റെ നാനാഭാഗത്തുമുള്ള മലയാളികൾ ജാതിമത ഭേദമന്യേ ഓണത്തിനായുള്ള കാത്തിരുപ്പിലാണ്.

ഓണം നിറവിന്റെ പ്രതീകമാണ്. ഇല്ലങ്ങളിലെ പത്തായങ്ങളെല്ലാം നിറഞ്ഞ്, കുടിലുകളിലെ വല്ലങ്ങളെല്ലാം നിറഞ്ഞ്, നിറവിന്റെയും സന്തുഷ്ടിയുടെയും സമയം. പാടങ്ങളിലെ പണിയെല്ലാം കഴിഞ്ഞ്, കൃഷിപ്പണി ചെയ്യുന്നവർക്കും ചെയ്യിക്കുന്നവർക്കും കൊണ്ടാടാനുള്ള അവസരം. ജന്മിമാരും അടിയാന്മാരും വ്യത്യാസങ്ങൾ മറന്ന് സമഭാവനയോടുകൂടി കഴിയുകയും പരസ്പരം സ്നേഹ സന്ദർശനങ്ങൾ നടത്തുകയും ഒരേ വേദിയിൽ ഒത്തുചേരുകയും ചെയ്യുവാൻ ഉപകരിച്ചിരുന്ന ഈ കാർഷികോത്സവം ക്രമേണ മലയാളികളുടെ ദേശിയോത്സവമായി മാറി.

മഹാബലി എന്ന ചക്രവർത്തിയുടെ ഭരണകാലം, ആ കാലം എന്നായിരിക്കാം ?
ആയിരത്താണ്ടുകൾക്കപ്പുറത്തുനിന്ന് ഒരോർമ്മയുടെ നാളം നന്മയുടെ പ്രകാശം പകർന്ന് നമ്മിലൂടെയും കടന്നു പോകുന്നു.
കേരളത്തിലെ ‘നിറ’ എന്ന ഐശ്വര്യ സമൃദ്ധിയെപ്പറ്റി വർണ്ണിക്കുന്ന കാവ്യം തലമുറകൾക്കു പാടി മതിയാവുന്നില്ല ഇപ്പോഴും
“മാവേലി നാടുവാണീടും കാലം
മാനുഷരെല്ലാരുമെന്നു പോലെ
ആമോദത്തോടെ വസിക്കും കാലം
ആപത്തങ്ങാർക്കുമൊട്ടില്ല താനും
കള്ളവുമില്ല ചതിവുമില്ല
എള്ളോളമില്ല പൊളിവചനം
കള്ളപ്പറയും ചെറു നാഴിയും
കള്ളത്തരങ്ങൾ മറ്റൊന്നുമില്ല”
എന്നതാണ് ഏറെ പ്രചരിച്ചു നിൽക്കുന്ന കവി വചനം. ആ ഐശ്വര്യ ഭരണത്തിൽ അസൂയ പൂണ്ട ദേവൻ മാർക്കു വേണ്ടി വാമനൻ മഹാബലിയെ പാതാളത്തിലേക്കു ചവിട്ടിത്താഴ്ത്തിയതും , തന്റെ പ്രജകളെ സന്ദർശിക്കാൻ മഹാബലി ആണ്ടിലൊരിക്കലെത്തുന്നതും മലയാള നാട് എത്ര തലമുറകളിലേക്കു പകർന്ന കഥയാണ്. ജീവിത രീതികളുടെ ഭാഗമായി ആഘോഷച്ചടങ്ങുകളിൽ വ്യത്യാസങ്ങൾ ഉണ്ടാകമെങ്കിലും, ആചാര സങ്കൽപ്പങ്ങളിലും, ഒത്തുചേരലുകളുടെ ആഹ്ലാദത്തിലും ഓണം ഇന്നും ഓണമായി തന്നെ നിലകൊള്ളുന്നു.

കർക്കിടകം എന്ന പഞ്ഞമാസം കഴിഞ്ഞ് മാനം തെളിയുന്ന കാലമാണ് വിദേശ കപ്പലുകൾ പണ്ട് സുഗന്ദദ്രവ്യങ്ങളുടെ വ്യാപാരത്തിനായി അടുത്തിരുന്നത്. മഴ മാറി വാണിജ്യം പുനരാരംഭിക്കുന്നത് ശ്രാവണ മാസത്തിലെ തിരുവോണ നാളിലാണ്. ദൂരെ നങ്കൂരമിട്ടു കിടന്നിരുന്ന കപ്പലുകൾ അന്നാണ് സ്വർണ്ണവുമായി തുറുമുഖത്തെത്തിയിരുന്നത്. അങ്ങിനെ സ്വർണ്ണ നാണയം കൊണ്ടുവന്നിരുന്ന ഈ മാസത്തെ പൊന്നിൻ ചിങ്ങമാസമെന്നും ഓണത്തെ പൊന്നോണമെന്നും വിളിക്കാൻ കാരണമായി എന്ന് പറയപ്പെടുന്നു. ശ്രാവണത്തിന്റെ പാലി സമാന്തരമാണ് ‘സാവണം ” അത് ആദിരൂപം ലോഭിച്ച് പാലിയുടെ തന്നെ നയമനുസരിച്ച് ” ആവണം ” എന്നും പിന്നീട് ” ഓണം ” എന്നും ഉളള രൂപം സ്വികരിച്ചു.

ആണ്ടുപിറപ്പിനെ സൂചിപ്പിക്കുന്ന ചിങ്ങമാസത്തിലെ ആഘോഷം ക്രമേണ ദേശീയോത്സവമായി വളർന്നുവെന്നാണ് ചില സാമൂഹ്യ ശാസ്ത്രജ്ഞൻമാർ വിലയിരുത്തുന്നത്.
ഓണത്തിന് ബുദ്ധമതവുമായും ബന്ധം ഉണ്ടെന്നു ചരിത്ര പണ്ഡിതന്മാർ വിശ്വസിക്കുന്നു. ബുദ്ധ ഭിക്ഷുക്കളായ ശ്രാവണന്മാരെ സംബന്ധിച്ചുളളതാണ് ശ്രാവണം. സംഘകാലത്ത് കേരളത്തിലും തമിനാട്ടിലുമെല്ലാം ബുദ്ധമതം പ്രബലമായിരുന്നു. അന്നൊക്കെ മഴക്കാലത്ത് ഭജനയിരിക്കലും പഠനവും ഒക്കെയായി ജനങ്ങൾ കഴിഞ്ഞു കൂടിയിരുന്നു. അതിന്റെ തുടർച്ചയായിരിക്കാം ഇന്നത്തെ കർക്കടക മാസത്തെ രാമായണ വായന . ബുദ്ധഭിക്ഷുവായി ദീക്ഷ സ്വീകരിച്ചു കഴിഞ്ഞ് ശ്രാവണന്മാരായി മാറുന്ന യുവ ഭിക്ഷുക്കൾക്ക് , അവരുടെ ദീക്ഷയുടെ പ്രതീകമായി ഒരു മഞ്ഞ വസ്ത്രം കൂടി നൽകുക പതിവുണ്ടായിരുന്നു. ഈ സംഭവത്തെ അനുസ്മരിക്കുന്നതാണ് ഓണകാലത്തു കുട്ടികൾ ഉടുക്കുന്ന മഞ്ഞക്കോടിയെന്നും വാദമുണ്ട്.

ഇന്ന് സൂപ്പർ മാർക്കറ്റിൽ നിന്നും എല്ലാം റെഡിമേയ്ഡ് ആയി സുലഭം. മാവേലി മന്നനെ കാലാന്തരത്തിൽ പ്രച്ഛന്ന വേഷമിട്ട കോമാളി രൂപത്തിലുള്ള ഒരു കുടവയറനാക്കി മാറ്റി എന്നാലും ഓണം ഓണം തന്നെ. വള്ളം കളിയും അത്തപ്പൂ മത്സരങ്ങളും പുലി കളിയും , ഘോഷയാത്രയും ഒക്കെയായി ജാതി മത ഭേദങ്ങളെല്ലാം മറന്ന് നാമെല്ലാം ഒന്നാണ് എന്ന അനന്തമായ സത്യം ഓർമ്മപ്പെടുത്തുന്ന ഒത്തു ചേരലിന്റെ ഒരുത്സവമായി അത് മാറി. ലോകത്തിന്റെ ഏതു കോണിലായാലും മലയാളി ഏറ്റവും ചെറിയ രീതിയിലെങ്കിലും ഓണം ആഘോഷിച്ചിരിക്കും. എല്ലാ പ്രിയ സൗഹൃദങ്ങൾക്കും ഓണ ദിനങ്ങളുടെ ആശംസകളോടെ..