💐 വീണാ പാണീ നമ:സ്തുതേ🦋

രചന : കൃഷ്ണമോഹൻ കെ പി ✍️

വെള്ളപ്പാൽക്കടൽ നടുവിൽ വിലസും
വെള്ളത്താമര തന്നിൽ മരുവും
വെള്ളപ്പൂവുടയാടയണിഞ്ഞിരിക്കും
വീണാവാദ്യ വിനോദിനീ കുമ്പിടുന്നേൻ

താമരോത്ഭവ പാണിതൻ തഴുകലിൽ
താനേയുണർന്നു ചിരിച്ചു നിൽക്കും
താരാനയന വിമോഹിനീ സരസ്വതീ
താരാംഗനാപൂജിതേനമ:സ്തുതേ

പീയൂഷാഞ്ചിത വാണി ചൊരിഞ്ഞു നൽകി
പാൽവർണ്ണപ്പൂപ്പുഞ്ചിരി തൂകി നിൽക്കും
പാരിന്നുണ്മയെ കാട്ടിയൊരുക്കിടുന്ന
പാരിന്നറിവിനുറവേ പ്രണമിച്ചിടാം

കാലാകാലമറിവു മറച്ചിടുന്ന
കാകോളത്തെയൊതുക്കി വകഞ്ഞു മാറ്റി
കാണിക്കുന്നൊരു ജ്ഞാനതപസ്വിനീ നിൻ
കാലിൽ തൊട്ടു വണങ്ങിടുന്നു ത്രൈലോക്യ സാരം

ഭൂമണ്ഡലത്തിൽ ജനിച്ചു മരിച്ചിടുന്ന
ഭൂതവേശിതമർത്യ മനോരഥത്തിൽ
ഭേദം കൂടാതെയണഞ്ഞു തെളിച്ചിടുന്ന
ഭൂമാതാസോദരീ,തവ പദം കൈതൊഴുന്നേൻ🎻