🌷 നഷ്ട സ്വപ്നങ്ങൾ🌷

രചന : ബേബി മാത്യു അടിമാലി✍

ഇടറുന്നു ഹൃത്തടം പിടയുന്നു നെഞ്ചകം
കാലം നിശബ്ദമായ് തേങ്ങിടുന്നു
ഒരു തരി നെൻമണി തേടി അലയുന്നു
ചിങ്ങമാസത്തിൽ വയൽ പക്ഷികൾ
പൊന്നാര്യൻ പാടത്തെ കൊയ്തു പാട്ടിന്നില്ല
സമ്പൽ സമൃദ്ധിയും ഓർമ്മകളായ്
ഊഷ്മളമായുള്ള കാലവും മാറുന്നു
എങ്ങും നിറയുന്നലോസരങ്ങൾ
വയലുകൾ പൂക്കുന്ന ഗ്രാമങ്ങളാകവേ
നഗരങ്ങളാകുവാൻ
വെമ്പിടുന്നു
അതിലൂടെയൊഴുകുന്ന പുഴയിന്നു കരയുന്നു
മാലിന്യ വാഹിയായ് തീർന്നിടുന്നു
കാലം തെറ്റിയ തോരാ മഴകളിൽ
പൊലിയുന്നു മർത്യന്റെ ജീവസ്വപ്നം
ഇനിയും വസന്തം തിരികെ വന്നീടുവാൻ
നഷ്ട സ്വപ്നങ്ങളെ നെഞ്ചിലേറ്റാൻ
അഹമെന്ന ചിന്ത കഴുകി കളഞ്ഞിടാം
ഇഹമെന്നൊരാത്മബോധം വളർത്താം.