🌼ഉത്രാടം,ഊഷ്മള വചനങ്ങളോടെ🌻

രചന : കൃഷ്ണമോഹൻ കെ പി ✍

ഉത്തമന്മാർക്കൊപ്പം ഒത്തൊന്നു വിളയാടി
ഉത്തരമില്ലാതുള്ള ഉത്രാടപ്പാച്ചിലോടെ
ഉത്തമ ഹൃത്തുക്കളെ ഉന്മാദ പരാവാര
ഉത്തുംഗത്തിരകളിലെത്തിക്കാൻ നിമിത്തമായ്
ഉത്ഭവിച്ചൂ ഞാനീ ഉലകിന്മടിത്തട്ടിൽ
ഉത്സുകരായീടേണമേവരും
ഉണർന്നേല്ക്കൂ
ഉത്തമോത്തമനാകുമ്പൊരുളിൻ്റെയവതാരം
ഉത്തരത്തോളമൊന്നുമുയരവുമില്ലാത്തവൻ
ഉത്തമഭക്തൻ തൻ്റെ ദർപ്പവുമടക്കിത്തൻ
ഉത്തരവാദിത്വത്തെ ചെയ്തിട്ടാ വാമനനോ
ഉത്സാഹമേറ്റാനായി, ഭക്തന്നു നല്കീ വരം
ഊനമില്ലാതെയെത്തൂ
വർഷത്തിലൊരു ദിനം
ഊഷ്മളചിത്തത്തോടെ ഭക്തനെ വരവേല്ക്കാൻ
ഉത്രാടമിവന്നേകീ പ്രാരംഭകർത്തവ്യങ്ങൾ
ഉത്തമർ മലയാളദേശത്തു വസിക്കുന്നോർ
ഉത്സാഹഭരിതരായ് ഓണത്തെ വരവേല്ക്കൂ
ഉത്തുംഗശ്രൃംഗത്തിൽ നിന്നെത്തിടും ഉത്രാടം ഞാൻ
ഉത്തമർ പിറക്കുന്നൂ
” ഉത്രാടം” നക്ഷത്രത്തിൽ…⭐