🌷 ഉത്രാട പുലരിയിൽ ….🌷

രചന : ബേബി മാത്യു അടിമാലി✍

ഉത്രാട പുലരിയിൽ ഉല്ലാസവേളയിൽ
പോയ കാലത്തിന്റെ കാൽപ്പാടുകൾ
ഓടിയെത്തുന്നെന്റെ ഓർമ്മകളിൽ
ഇനിയും വാടാത്ത പുഷ്പ്പങ്ങളായ്
പെയ്യ്തൊഴിയാത്തൊരു തോരാമഴയുടെ
സ്പന്ദനമിന്നും ഞാൻ കേട്ടു കാതിൽ
വ്യക്തമല്ലെങ്കിലും കേൾക്കാമെനിക്കേതോ
തംബുരുമീട്ടുന്ന ഓണഗീതം
ഒരുജന്മം മുഴുവനും ഓർമ്മിക്കുവാനായി
ഒരുപാട് സ്വപ്നങ്ങൾ തന്നയോണം
ഒത്തിരി സന്തോഷം ഒന്നിച്ചുചേരുന്ന
ഓണത്തിൻ പൂക്കളമെന്നപോലേ
ഓണദിനങ്ങളിൽ ഊഞ്ഞാല്കെട്ടി ഞാൻ
എത്രയോ ആയത്തിൽ ആടി അന്ന്
ഓണത്തിൻ കോടിയും ഓണ രുചികളും
ഇന്നും മറക്കുവാൻ ആവതില്ലാ
നന്മതൻ നിറവിന്റെ സമതതൻ തിരുവോണം
നാനാ മതസ്തരും ഒന്നെന്ന ചിന്തയാൽ
നാടിന്റെ ആഘോഷമായ ഓണം
ഇന്നിതാ മറ്റോരു ഓണമെത്തീടുമ്പോൾ
ഓർക്കുന്നു ഞാനാ മധുര കാലം
ഓർമ്മ ചിരാതിലേ സ്വപ്ന കാലം.