രചന : ഷാഫി റാവുത്തർ ✍
ഒരിക്കലും നിലച്ചിടാതുറക്കെ
നീ… കുതിക്കണം
അമരഹൃദയമൂർജ്ജമാക്കി
അവനിതന്നിലുയരണം
അടിച്ചമർത്തിയവഗണിക്കു-
മാളുകൾക്കു മുന്നിലായ്
അടിമമാനസം തകർക്കു-
മാത്മസത്യമറിയണം
ചൂഷണത്തിനമ്പുകൾതൻ
മുനയടിച്ചൊടിയ്ക്കണം
കാരിരുമ്പിൻ ചങ്ങല-
ത്തളപ്പറുത്തെറിയണം
വേട്ടനായ്ക്കളെതിരിടുമ്പോൾ
വേദന മറക്കണം…
ദ്വേഷസാഗരത്തിരയ്ക്ക്
തടയണയൊരുക്കണം
ദീപമായ് ജ്വലിക്കണം നീ
കൽത്തുറുങ്കിരുട്ടിലും..
അക്ഷരങ്ങൾ നേരിലേക്കു
പാലമായ്പ്പണിയണം
ആശയത്തെയാത്മമായ്-
പ്പുണർന്നു നേരെനീങ്ങണം
സങ്കടത്തലയ്ക്കുമേലെ
പുഞ്ചിരിപൊഴിക്കണം
മണ്ണിനെന്നും മധുരമൂറും
നന്മതന്നെയേകണം
ജീവനുള്ള നാൾ വരേക്കും
തലയുയർത്തിനിൽക്കണം.