💞പനങ്ങാട് ജലോത്സവം💞

രചന : കനകം തുളസി✍️

ഉത്സവമേളം മഹോത്സവമേളം
ഇത് ജലോത്സവമേളം…
ഉത്സാഹഭരിത ജനമനസ്സിൽ
തുഴയുടെ തുടിമേളം.
ഉന്മാദം തിരതല്ലുന്നൂ … ഈ ഉല്ലാസവേളപ്പൂങ്കാറ്റിൽ.
ഉള്ളമുണരുന്നൂ …. ഉഷമലരിപ്പൂവുകൾ പോലെ.
പനങ്ങാടിൻ കായൽമനസ്സിൽ
പൊന്നോളത്തിര,തുള്ളാൻ
പനപോലെ വളരുന്നു
പഴയൊരുകാലക്കുളിര്.
പതച്ചു,തുടിച്ചു നീന്തിപ്പൊങ്ങി പകലിരവും പുളകംചാർത്തി,
പുഴയുടെതീരേ പ്രണയംകണ്ട്
പുഴയുംപൂമീനും കൺചിമ്മി,പ്പഴയകാലം.
മങ്ങിമറഞ്ഞൊരു മിഴിവേകുങ്കാലം
മടക്കിയെടുക്കാൻ,
മാലിന്യമകലും
മന്ദാരക്കാറ്റൊന്നു പുൽകാൻ,
മനമിണങ്ങി, മതമുറങ്ങീ
മെയ് വഴങ്ങീ മൊഴിയുണർന്നൂ
മലരുംകിളിയുമണഞ്ഞൂ.
തൊഴുതുമടങ്ങും
സംഗമസന്ധ്യയിൽ
തെളിമാനത്തമ്പിളി
അണിചേരാൻ താരും തളിരുംതനുവും മിഴിതുറന്നു.
തുഴയേന്തും കായബലത്തിന്
തുകിലടിമേളത്തിൻ
ഉത്രാടപ്പാച്ചിൽ
മനസ്സിന്നുത്രാടപ്പാച്ചിൽ.
തുഴയുടെതാളം നീരിൽ,
തിരയുടെവേഗം നിറവിൽ,
തുടിതാളംതുള്ളിപ്പായുന്നേ
കുമ്പളമിന്നൊരു നവചേതനയുടെ പിറവിക്കായ് തുടികൊട്ടുന്നേ.
ചേപ്പനം, ചാത്തമ്മ ചാന്തണിഞ്ഞൂ
ചന്തത്തിൽ ചിന്തകൾ
പൂത്തുലഞ്ഞൂ
ചങ്ങാതിക്കൂട്ടങ്ങൾ
ചങ്കായി നിന്നപ്പോൾ
ചങ്കിനകത്തൊരു
ശിങ്കാരിമേളത്തുടുതുടുപ്പ്.
ആർപ്പോ … ഇർറോ …