🌲ഒഴുകിയെത്തുന്ന പുല്ലാങ്കഴിലൂടെ🌳

രചന : കൃഷ്ണമോഹൻ കെ പി ✍️

ഒഴുകിയെത്തുന്നു, ഓടക്കുഴൽ നാദം
ഒടുവിൽ, മാമക ചിത്തം കുളിർപ്പിക്കാൻ
ഒരുങ്ങി നില്ക്കുമീ ഭൂമി തന്നുള്ളത്തിൽ
ഒരു ദിവാസ്വപ്നം, പാകിത്തളിർപ്പിക്കാൻ…
ഒരുമയോടെയിച്ചരാചരമൊക്കവേ
ഒരു പ്രണവത്തിൻ നാദം ശ്രവിക്കുന്നൂ
ഒളികണ്ണോടെ ജഗത്തിൻ്റെ മാനസം
ഒലിയലയതിൽ മഗ്നമായ്ത്തീരുന്നൂ
അമരവീഥിയിലാടിത്തിമിർക്കുന്ന
അരുണവീചികളാകാശമാകവേ
അതിമനോഹര വർണ്ണങ്ങൾ തൂകുന്നൂ
അതുകണ്ടീബ്ഭുവി, കോരിത്തരിക്കുന്നൂ
അവനിതന്നുടെ, ഭാവഹാവാദികൾ
അനുനിമിഷവും മാറിമറിയുന്നൂ
അമൃത സംഗീതം പേറും കുഴൽ നാദം
അമരരാക്കുന്നു ജീവതന്തുക്കളെ
അതിമനോഹരപുഞ്ചിരിതൂകിയാ…
അനഘസൗന്ദര്യ പുല്ലാങ്കുഴൽധാരി
അഭിരമിക്കുന്നു, ഭാവാർദ്രരൂപനായ്
അഖിലർക്കും, നാദസൗഭഗമേകുവാൻ
അലസമാനസവേദിയതിങ്കലും
അതിമനോഹര, നൃത്തച്ചുവടുമായ്
അവനിപാലകനെത്തുന്ന വേളയിൽ
അതിവിലോലമായ്, വേണു തൻ വാദനം🦋