🌹 ജീവിതംഇത്ര സങ്കീർണ്ണമാക്കണോ ?🌹

ലേഖനം : ബേബി മാത്യു അടിമാലി✍

ചെറിയ കാര്യങ്ങളെപോലും വലിയ സങ്കീർണ്ണമാക്കി എടുക്കുകയും അതിനുവേണ്ടി വഴക്കിടുകയും അതിനെപ്രതി ദു:ഖക്കുകയും അതിനെപ്രതി വേദനിപ്പിക്കുകയും സ്വയം വേദനിക്കുകയും ചെയ്യുന്നതാണ് മനുഷ്യന്റെ ഏറ്റവും മോശമായ ഒരു സ്വഭാവം.
ഏറ്റവും ലളിതമായി ഒരു കാറ്റു വീശുന്നതുപോലെ കടന്നുപോകേണ്ടിയിരുന്ന എത്രയോ ചെറിയ സംഭവങ്ങളെ നമ്മൾ മുറിവാക്കി പുണ്ണാക്കി അതിൽ വേദനിച്ച് മറ്റുള്ളവരേയും വേദനിപ്പിച്ച് ജീവിക്കുന്നു.

നമ്മളോട് മറ്റുള്ളവർ പറയുന്ന ചെറിയ വാക്കുകൾ , സംസാരത്തിൽ ഉണ്ടാകുന്ന ചെറിയ പിഴവുകൾ അതൊക്കെ എത്ര സങ്കീർണ്ണമായിട്ടാണ് നമ്മൾ എടുത്തിട്ടുള്ളത്. വെറുതെ ഒന്നാലോചിച്ചാൽ നമുക്ക് മനസിലാക്കുവാൻ കഴിയും നമുക്കുണ്ടായിരുന്ന ബന്ധങ്ങളിൽ നമ്മടെ സൗഹൃദനീലിമകളിൽ നല്ല പങ്ക് നഷ്ടപ്പെടുത്തിയിട്ടുള്ളത് എത്രയോ ലാഘവത്തോടെ എടുക്കാമായിരുന്ന കാര്യങ്ങളെ അതിഗൗരവത്തിൽ എടുത്തതുകൊണ്ടും വഷളാക്കിയതുകൊണ്ടുമല്ലേ ?

എത്ര സ്നേഹത്തിലിരുന്നവർ വിശേഷാവസരങ്ങളിൽ ആഹാരം പങ്കുവെച്ചിരുന്നവർ, ഒരപകടമുണ്ടായാൽ ഓടിഎത്തിയിരുന്നവർ എത്ര പെട്ടന്നാണ് പിരിഞ്ഞ് ശത്രുക്കളെപോലെ വെറുപ്പോടെ മുഖംകൊടുക്കാതെ പരസ്പരം തെന്നിമാറി പോകുന്നത്. കാരണം പരിശോദിചിച്ചാൽ വളരെ ചെറിയ കാര്യങ്ങൾക്കായിരിക്കാം. ലളിതമായ കാര്യങ്ങളെ സങ്കീർണ്ണമാക്കി ജീവിതത്തിന്റെ എല്ലാ അനുഭൂതികളെയും നശിപ്പിച്ചു കളയുകയല്ലെ പലപ്പോഴും നമ്മൾ ചെയ്യുന്നത്.

ഒരു ബസിൽ യാത്ര ചെയ്യുമ്പോൾ ബാക്കി ഒരു രൂപ ചില്ലറ കിട്ടാത്തതിന്റെ പേരിൽ , അബദ്ധത്തിൽ ഒരു സ്റ്റോപ്പ് മാറി വണ്ടി നിർത്തിയതിന്റെ പേരിലൊക്കെ വളരെയധികം കലഹിക്കുന്ന മനുഷ്യരെ നമുക്കു ചുറ്റും കാണാൻ കഴിയും. ഫൊൺ ചെയ്തപ്പോൾ എടുക്കാത്തതിന്റെ പേരിൽ , ഒരു ജന്മദിനത്തിന് ആശംസകൾ അറിയിക്കാത്തതിന്റെ പേരിൽ നിത്യജീവിതത്തിൽ അങ്ങിനെ എത്രയോ സന്ദർഭങ്ങളിൽ നാം പലരോടും പരിഭവിക്കുന്നു വഴക്കു കൂടുന്നു.

ചായക്കടകളിലൊക്കെ ഭക്ഷണത്തിന്റെ സ്വാദു കുറഞ്ഞതിനും , വിലയുടെ തർക്കത്തിലും ഒക്കെ ആളുകൾ വഴക്കു കൂടുന്നതും മരണം വരെ സംഭവിക്കുന്നതുമായ വാർത്തകൾ നമ്മൾ കേൾക്കുന്നു.

മുന്നിൽ വരുന്ന ഏതുകാര്യത്തെയും അത് വലുതായാലും ചെറുതായാലും സങ്കീർണ്ണമാക്കാതെ നേരിടാൻ പഠിക്കണം. അങ്ങിനെ ചെയ്തില്ലങ്കിൽ നമ്മൾ നമ്മുടെ ജീവിതത്തോട് വലിയ അനീതിയാണ് ചെയ്യുന്നത് എന്ന് നമ്മൾ തിരിച്ചറിയണം.