🔥ചിരാത്🔥

രചന : കൃഷ്ണമോഹൻ കെ പി ✍

മൺവിളക്കല്ല ഞാൻ ഭൂതലവാസികൾ
മാനസം തന്നിൽത്തെളിഞ്ഞു നില്ക്കും
മുഗ്ദ്ധമാം സ്നേഹത്തിൻ ശോഭ തന്നിൽ
മഗ്നയാം സൗവർണ്ണദീപപ്രഭ

സന്മനോഭാവമാം വിളക്കിലായി
സ്നേഹത്താൽ സ്നേഹം പകർന്നൊഴിച്ച്
സാമ്യോക്തികളാലെ മന്ത്രമോതി
സാദരം ദീപം തെളിച്ചു വച്ചാൽ

മൃണ്മയമാകും ശരീരമതും
മൺനിറമോലും ചിരാതുമൊന്നായ്
മഞ്ജുള ദീപപ്രഭ ചൊരിയും
മംഗളമാകും പ്രപഞ്ച ദീപ്തി

സംവത്സരങ്ങൾ നിമിഷങ്ങളാം
സംഖ്യയിലെണ്ണും സവിതാവു തൻ
സങ്കേതമാകുന്നൊരഗ്നിയെന്നെ
സംപൂജ്യയാക്കുന്നിരുൾമറയിൽ

ചുറ്റും വെളിച്ചം പകർന്നിടുന്നൂ
ചെറ്റുംമടിയേതുമേന്തിടാതെ
മുറ്റുന്ന മോദത്തിരയിളക്കി
മുറ്റത്തിരുന്നു ചിരിച്ചിടട്ടേ👑