രചന : രാജു കാഞ്ഞിരങ്ങാട്✍
പ്രിയനേ…..,
ചുണ്ടിൽ
ചുംബനത്തിൻ്റെ
ചോണനുറുമ്പുമായ്
നീയണഞ്ഞാൽ
കാറ്റിൻ്റെയറ്റത്തൂടെ
കവിതയുടെ തുഞ്ചത്തൂടെ
ഞാനൊരപ്പൂപ്പൻ താടിയായി
പറക്കും
പ്രണയ തടാകത്തിൽ
പൊൻമയെപ്പോലെ നീ
ഊളിയിട്ട്
എന്നെയും ചുണ്ടിലേറ്റി
കാടും
കടലും
മരുഭൂമിയും കടന്ന്
വേദനയുടെ മുള്ള് മറന്ന്
വികാരത്തിൻ്റെ
വേര് തേടുമ്പോൾ
നമ്മിൽ ഗ്രീഷ്മം കത്തിപ്പടരും
പ്രണയത്തിൻ്റെ
ആകാശചരുവിലേക്ക്
ശിശിരത്തിൻ്റെ മൺചെരാതുമായി
മീവൽ പക്ഷികളെപ്പോൽ
പിന്നെയും നാം പറക്കും
പ്രിയനേ….,
അധരത്തിൽ നിന്നും
അടർത്തിമാറ്റുവാൻ കഴിയാത്ത
ഒരു ചുംബനമാണു നീ
