🦄 അർദ്ധനഗ്നം, എങ്കിലും, അർത്ഥഗർഭം.🐡

രചന : കൃഷ്ണമോഹൻ കെ പി ✍

അർത്ഥഗർഭമാം മൗനവും പേറിയീ
അങ്കണത്തിലവതരിച്ചുള്ളൊരു
അർദ്ധനഗ്നയാം അംഗനാരത്നമോ
അത്ഭുതങ്ങൾ രചിക്കുന്ന കാലമേ

അംഗുലികളിൽ വാഗ്ധാര തന്നുടെ
തുംഗമാം നവനീതം പുരട്ടുന്ന
മംഗളരൂപി ചിത്പുമാനായിട്ടോ
സംഗതി വശാൽ നിന്നെക്കരുതണം!

വ്യർഥമോഹങ്ങൾ കൂടുകൂട്ടീടുന്ന,
വ്യക്തികൾ തൻ മനസ്സിൻ്റെയുള്ളിലായ്
വ്യക്തം, നർത്തനമാടും നിമിഷങ്ങൾ
നിർന്നിമേഷമങ്ങുറ്റുനോക്കീടുന്നൂ

ജീവിതവീഥിതന്നിൽ പൊഴിയുന്ന
ജീവികളാകും പുഷ്പങ്ങൾ തന്നുടെ
ജീവശ്വാസമായ് കാണട്ടെ നിന്നെ ഞാൻ
ജീവതന്തുവാം, കാലമേ, എന്നുമേ…

പാരിടത്തിൻ്റെ സഞ്ചാര പാതയിൽ
പാന്ഥനൊന്നു തളർന്നുനിന്നീടുമ്പോൾ
പാൽക്കടൽ വാഴും, വിഷ്ണുവെപ്പോലെ നീ
പാരമൊന്നങ്ങു പുഞ്ചിരി തൂകുന്നൂ

വന്മരങ്ങൾ നിൻ കൈവിരൽത്തുമ്പിലെ
വമ്പെഴുന്ന നഖങ്ങളായ് മാറവേ
വഞ്ചിച്ചീടുന്നു കാലമാം മാന്ത്രികൻ
വമ്പോടങ്ങു കൊഴിയും നിമിഷത്താൽ

സാരമില്ലെൻ്റെ ജീവിതയാത്രയിൽ
സാരസോക്തികളോതി മറഞ്ഞിടും
സംവത്സരം തൻ്റെ, ദീർഘനിശ്വാസത്തിൽ
സന്മനസ്സിൻ, പുതുവർഷം കാണ്മു ഞാൻ

കാലമേ, നിൻ്റെ തൂണീരം തന്നിലെ
കാമ്യമായിടുമസ്ത്ര നിമിഷങ്ങൾ
കാര്യബോധത്തോടെയ്തു തീർത്തീടുക
കാണുമപ്പോഴെൻ സ്വർഗ്ഗമനാകുലം🦇