രചന : കുട്ടുറവൻ ഇലപ്പച്ച✍
എല്ലാ പിണക്കത്തിൻ്റെയും മൂന്നാം നാൾ
അയാൾക്ക് കൃത്യമായി പനി വരും
അപ്പോഴെല്ലാം അവൾ ഓടി വന്നു
ചുക്കുകാപ്പി ഉണ്ടാക്കിക്കൊടുത്തു
പാരസെറ്റാമോൾ കൊടുത്തു
തുണി നനച്ച് ചൂടൊപ്പിക്കൊടുത്തു
പനി മാറി.
പിണക്കവും മാറി
എല്ലാ തവണയും എന്താണിങ്ങനെ?
വെറുതെയിരുന്നപ്പോൾ അവൾ ആലോചിച്ചു.
അയാൾ ഒരു വെണ്ണക്കട്ടിയാണ്.
അവളില്ലാതെ അയാൾക്ക്
ജീവിക്കുവാൻ വയ്യ
സൂര്യവെളിച്ചത്തിലേക്ക് ഇറങ്ങിയാൽ
അലിഞ്ഞു പോയേക്കാവുന്ന ഒരു ജന്തു
അവൾക്കു ചിരി വന്നു, പ്രേമവും
ആണുങ്ങളോളം ദുർബലരായ
ജനവിഭാഗം ഭൂമിയിലില്ല.
ആരോടും ഇതു പറയുകയില്ലെങ്കിലും
അവൾ ഉറപ്പിച്ചു.
അവൾക്കത്
നല്ല ആത്മവിശ്വാസവും നൽകി.
അവളിപ്പോൾ കൂടുതൽ സുന്ദരിയായി.
അവൾ ഒരു പാട്ടു പാടി
ഒന്നുകൂടി പിണങ്ങുവാൻ
എന്താണൊരു വഴി എന്നവൾ
ആലോചിച്ചു.
ആ മൂന്നാം നാളിലെ പനിയോടാണ്
അവൾക്കിപ്പോൾ പ്രേമം.