🙏 ഓം നമ:ശിവായ🙏

രചന : കൃഷ്ണമോഹൻ കെ പി ✍

ഹരഹരമന്ത്രത്താൽ മുഖരിതമാകുന്ന
ധരണിതൻ പൊന്മടിത്തട്ടിലായി
മരുവും ചരാചര മുരുവിട്ടിടുന്നിതാ
പരമ പവിത്രമാം പഞ്ചാക്ഷരി

ഹരനാം പരമേശചരണങ്ങൾ പൂകുവാൻ
ത്വരയേറി നാമം ജപിച്ചിടുന്നൂ
പരമോന്നതിയാകും മോക്ഷം ലഭിക്കുവാൻ
തരമോടെ കൈകൂപ്പിനില്പു ഭക്തർ

അരുവി പോലൊഴുകുന്ന കരുണതൻ തീരത്ത്
പരമപദം നല്കും ഭക്തിമാർഗ്ഗം
ഒരുനാൾ ലഭിക്കുമെന്നാശയും പൂണ്ടിതാ
മരുവുന്നു മാനുഷർ മന്ത്രമോതി

ചരണയുഗ്മങ്ങളെ ശരണം ഗമിക്കുന്നു
ചരിതം ശിവാത്മക ചരിതത്തിനാൽ
ഹര ഹരോ വന്ദിപ്പു മമ ചിത്തം താവക
സ്വരമാകുമോങ്കാരം കേട്ടിടുമ്പോൾ.