🌹 മഹാശിവരാത്രി 🌹

രചന : ബേബി മാത്യു അടിമാലി✍

ശിവരാത്രി , ഇന്നു മഹാശിവരാത്രി
നാഗരാജനെ കയറാക്കി
മന്ദാരപർവ്വതംകടയാക്കി
പാലാഴി മഥനം നടത്തിയപ്പോൾ
ലഭിച്ചൊരു കാളകൂടം കൊക്കിലൊതുക്കി
പാരിനെ രക്ഷിച്ച പരമേശ്വരൻ
അണ്ഡകടാഹത്തിൻ രക്ഷകനായ്

അർദ്ധനാരീശ്വരന് കൂട്ടായിയന്ന്
ഹൈമവതിയും സഖിമാരും
മഹാദേവൻ സഹിച്ച ത്യാഗവും
പാർവ്വതിതന്നുടെ പരിശുദ്ധിയും
മാറ്റുരച്ച രാത്രി ശിവരാത്രി

സംഹാര രുദ്രൻ കൈലാസനാഥൻ
താണ്ടവമാടിയ ശിവരാത്രി
ജഗത്തിന്റെ പാലകൻ
ഉലകത്തെ രക്ഷിക്കാൻ
ഉറക്കം മറന്നൊരു രത്രിയല്ലോ

വിവിധ ഭാവങ്ങളിൽ
വിവിധ രൂപങ്ങളിൽ
ഇന്നുമീ ഭൂമിയേ
വിഷലിപ്തമാക്കുവാൻ
എത്തിടും ശക്തികൾക്കെതിരെ പോരാടുവാൻ
ശക്തിയേകിടണേ ഉമാമഹേശ്വരാ
ജീവന്റെരക്ഷകാ ലോകനാഥാ