ഹാരിസ് ഖാൻ ✍
ആദ്യ ടെസ്റ്റ്ട്യൂബ് ശിശു രാമപത്നി സീതയാണെന്ന് കഴിഞ്ഞ ശാസ്ത്ര കോൺഗ്രസിൽ കേന്ദ്രമന്ത്രി അവകാശ വാദമുന്നയിച്ചിരുന്നെങ്കിലും പാശ്ചാത്യരുടെ ചരട് വലിമൂലം അതിൻെറ അവകാശം ഇപ്പോഴും ഫിഡാഡാൽഫിയക്കാരൻ വില്ല്യം പാൻകോസ്റ്റിൻെറ പേരിൽ തന്നെയാണ്..
റൈറ്റ് സഹോദരൻമാർക്ക് മുന്നെ ത്രേതയുഗത്തിലെ ഞങ്ങൾ പുഷ്പകവിമാനം കണ്ടുപിടിച്ചിരുന്നു എന്ന വാദവും തെളിവുകളുടെ അഭാവത്തിൽ നമുക്ക് സ്ഥാപിച്ചെടുക്കാനായില്ല.
ടെലിവിഷൻ സംപ്രേക്ഷണവും അത് റിപ്പോർട്ട് ചെയ്യാനൊരു പ്രശാന്ത് രഘുവംശവും പണ്ടേ രഘുവംശത്തിൽ ദ്വാപരായുഗത്തിൽ ഉണ്ടായിരുന്നതായി ദൂരെ നടന്ന കുരുക്ഷേത്രയുദ്ധം ഹസ്തിനപുരിയിലിരുന്ന ധൃതരാഷ്ട്രർക്ക് തൽസമയം സംപ്രേക്ഷണം ചെയ്യുകയും സഞ്ജയൻ ലൈവ് റിപ്പോർട്ട് ചെയ്യുകയും ചെയ്ത കാര്യം നമ്മൾ ചൂണ്ടിക്കാട്ടിയതും പാശ്ചാത്യർ പരിഹസിച്ച് തള്ളിക്കളയുകയായിരുന്നു…
ചാണകത്തിലെ പ്ലൂട്ടോണിയത്തിൻെറ കാര്യം ഉന്നയിക്കാനുള്ള അനുവാദം പോലും നമുക്ക് നിരസിക്കപ്പെട്ടു..
ദീർഘദൂര മിസൈലുകളുടെ അവകാശം ബ്രഹ്മാസ്ത്രവും, ആഗ്നേയസ്ത്രവും ചൂണ്ടിക്കാട്ടി അവതരിപ്പിച്ചെങ്കിലും അവർ നിഷ്കരുണം തള്ളികളയുകയായിരുന്നു. വേണേൽ സാധനം റഷ്യയിൽ നിന്നോ അമേരിക്കയിൽ നിന്നോ വാങ്ങി മുകളിൽ ബ്രഹ്മായെന്നോ ആഗ്നേയ എന്ന സ്റ്റിക്കറൊട്ടിച്ച് ആശ തീർത്തോ എന്ന സൗജന്യം അനുവദിച്ച് കിട്ടിയത് മാത്രം ആശ്വാസമായി…
നിസ്സാരമായ കേവലം ഓംലെറ്റ് ഓംകാരത്തിൽ നിന്നുത്ഭവിച്ചതാണെന്ന വാദം പോലും അവർ അനുവദിച്ച് തരികയുണ്ടായില്ല. വേണേൽ ആർക്കും വേണ്ടാത്ത പൂജ്യത്തിൻെറ മുകളിലുള്ള പിതൃത്വം എറ്റെടുത്തോ എന്ന സൗജന്യം മാത്രമാണ് ഇതുവരെ അനുവദിച്ച് കിട്ടിയത്…
എന്നാൽ ഇത്തവണ കളിമാറും…
മൊബൈലിൻെറ കണ്ടുപിടുത്തം നമ്മുടേതാണെന്നത് തെളിവ് സഹിതം നമുക്ക് സ്ഥാപിച്ചെടുക്കാനാവും, പുരാതനകാല ശിലകളിൽനിന്ന് മൊബൈലിൽ കോൾ ചെയ്യുന്നതിൻെറയും വാട്സപ്പ് യൂണിവേർസിറ്റിയിൽ തോണ്ടുന്നതിൻേറയും, ചിത്രങ്ങൾ ഇന്ത്യൻ ആർക്കിയോളജി വിഭാഗം പുറത്ത് വിട്ടിരിക്കുന്നു…
ആനന്ദിപ്പിൻ….
