🪶കാണുന്നതൊക്കെയും, കവിതയായ് മാറ്റുന്ന,കാവ്യസുരഭിയേ,.. സ്വസ്തി🪶

രചന : കൃഷ്ണമോഹൻ കെ പി ✍

കരവിരുതാലെൻ്റെ കരളിലെ സങ്കല്പം
ശില്പമായ്, മാറ്റിയതാരേ…
കമനീയ സ്വപ്നങ്ങൾ, വർണ്ണങ്ങൾ ചാലിച്ചു
ചിത്രങ്ങളാക്കിയതാരേ…
കവിത തുളുമ്പുന്ന കല്പനാ വൈഭവം
വരികളായ് തീർത്തതുമാരേ…
കരുതിയ സ്നേഹത്തിൻ കൂമ്പാരമൊക്കവേ
മഴയായ് ചൊരിഞ്ഞതുമാരേ…
കരുണതൻ സ്പർശനദ്യുതിയാലെ, മാനസം
പ്രഭവിതമാക്കിയതാരേ…
കരമേലടിയ്ക്കുന്ന തിര പോലെ ചിത്തത്തെ
കടലായി മാറ്റിയതാരേ…
കരുതലോടെന്നുമേ, വചന സൗഭാഗ്യങ്ങൾ
നിറവോടെ നൽകുവതാരേ…
കറയറ്റ നിർവാണ വാനപഥങ്ങളിൽ
മനമതുമെത്തിച്ചതാരേ…
കരണങ്ങൾ ലഘുവാക്കി വീഥി തെളിച്ചുള്ള
ഭവതത്വം, വിസ്മയിപ്പിപ്പൂ
കലയും പ്രകൃതിയും, ഇടകലർത്തീടുന്ന
സ്വരനിർഝരികളായ് മുന്നിൽ
കമനീയതയുടെ, പാരമ്യമായ് നില്ക്കും
കരുണാമയീ, നമസ്തുഭ്യം…
കരമിതിലേന്തിയ, തൂലിക തന്നിലായ്
കവിതതൻ ബീജങ്ങളേകും….
കലയുടെ ദേവതേ തവ മുന്നിലെന്നുമേ
കരം കെട്ടിടും ജീവജാലം…🙏