🌹 മലകൾ പുഴകൾ🌹

രചന : ബേബി മാത്യു അടിമാലി✍

മലകൾതൻ തോരാത്ത കണ്ണീരിനാൽ
പുഴകൾ വളർന്നു വലിയവരായ്
മലയോടു വിടചൊല്ലി പുഴകൾപോയീ
അതുമലരണിക്കാടുകൾ കണ്ടുതേങ്ങി
കടലിനെത്തേടിയൊഴുകുന്ന പുഴയുടെ
കരയിലൊരായിരം കരിയിലകൾ
നീന്തി തളർന്നവർ യാത്രനിർത്തി
വേരുകളിൽചാഞ്ഞു വെയിലുകാഞ്ഞു
നിശ്വാസമൂതി കിതപ്പകറ്റീയവർ
ആശ്വാസമോടെ കുളിരുമാറ്റി
പിന്നെയുമൊഴുകിയാ പുഴതനിയേ
കടലിന്റെ മാറിലായ് ചേർന്നലിയാൻ
ആയിരം തിരമാല കൈകളാലേ
പുഴകളെ വാരീപ്പുണർന്നുകടൽ
ഇതുകണ്ടു ദാഹിച്ചു കേഴുന്നിതാ
വറ്റിവരണ്ടൊരീ തരിശു ഭൂമി
ധരണിയും ചൊല്ലിയാ കടലിനോട്
മേഘങ്ങളായ് നിങ്ങൾ പെയ്യുമെങ്കിൽ
എന്നിലും ജീവൻ മുളച്ചുപൊങ്ങും എന്റെ
ജന്മസാഫല്യങ്ങൾ പൂർത്തിയാകും