🐥 സ്മൃതിയിലൂടെ മൃതിയിലേക്ക്🦉

രചന : കൃഷ്ണമോഹൻ കെ പി ✍

നീലവസ്ത്രമണിഞ്ഞെത്തീ പ്രകൃതിയാം ദേവീ
ചാലെ മാമക മനസ്സെന്ന ശ്രീലകത്തിങ്കൽ
ഗഗനമൊരു നീല, പിന്നെ ആഴിയൊരു നീല
ഗതികളായി മുന്നിലെത്തീ ചാരുവർണ്ണങ്ങൾ
അവനിതന്നുടെ മോഹമാകും സ്വരങ്ങളെത്തുന്നൂ
അതിവിദൂര നഭസ്സിൽ നിന്നാ വിഹഗജാലമതും
തരുലതാവലി ഹരിതവർണ്ണ ശോഭയേറ്റീടും
തലമിതാ, ഈ ഭുവനമാകെ ,സുഭഗമാകുമ്പോൾ
മനസ്സിലുള്ള, താളങ്ങളിൽ പദവിതാനങ്ങൾ
മധുരമായി ഗീതകങ്ങൾ ഉരുവിടും നേരം
മൃതിയതെന്നൊരു നിത്യസത്യം മുന്നിൽ മറയുന്നൂ
സ്മൃതികൾ തൻ്റെ പൊൻ വെളിച്ചം പതിയെ വീശുന്നൂ
ഇവിടെയെൻ്റെ കവനമങ്ങു നിലച്ചു പോയീടാം
ഇനി ജനിക്കാൻ ജന്മമൊന്നും ഇല്ലയെന്നാകാം
അരുവി തൻ്റെ കളകളങ്ങൾ അസ്തമിച്ചീടാം
അവിടെയെൻ്റെ മൃദുല ഗീതം വിസ്മരിച്ചീടാം
അതുമതിൻ്റെ ഓർമ്മയായി മുന്നിലെത്തുമ്പോൾ
അവികലമാം ജന്മമായ് ഞാൻ സാന്ത്വനംകൊള്ളും
അര നിമിഷമെങ്കിലുമീ പ്രപഞ്ച നീലിമയിൽ
അഹസ്സിനുള്ള സ്വരപ്രസാദം ഏറ്റുവാങ്ങീ ഞാൻ…🌹