🌝ഇരുളും, പൊരുളും🌞

രചന : കൃഷ്ണമോഹൻ കെ പി ✍

താരകപ്പൂക്കളെ രോമാഞ്ചമായേറ്റ
വാനിടം മെല്ലെക്കറുപ്പണിഞ്ഞൂ
താരാപഥത്തിൻ്റെ പാർശ്വത്തിലമ്പിളി
വാരിളം രശ്മിയുമായുദിച്ചൂ

താരാധിപനായ ചന്ദ്രനെക്കാണവേ,
നാണത്താൽ താരങ്ങൾ പോയൊളിച്ചൂ
താരാപഥത്തിൻ്റെ രഥ്യയിലൂടവൻ
തേരിൽ കരേറി ഗമിക്കയായീ

പക്ഷേ, ശശിയുടെയുൾക്കാമ്പിൽ മേവിടും
പഞ്ചകേശൻ്റെ, തിരുജടയിൽ
പാർവണത്തിങ്കൾക്കല ചെന്നു ചേർന്നു പോയ്
പശ്ചിമ ദിക്കും ഇരുളിലായീ…

വിണ്ണിൻ കരിമ്പടം മെല്ലെ മടക്കിയീ
മണ്ണിൻ്റെ മാറിലേയ്ക്കുറ്റു നോക്കി
കണ്ണതിൽ, പ്രേമത്തിൻ ഭാവങ്ങളുമായി
സ്വർണ്ണവർണ്ണത്തോടെയെത്തി ഭാനൂ

പ്രകൃതിയെ, ചിന്തതൻ, പൂ, കൊണ്ടു മൂടുന്ന
പ്രണവ ധ്വനിയങ്ങുണർന്നിടുന്നൂ
പ്രകൃതിയെപ്പട്ടുടയാടകൾ ചാർത്തുവാൻ,
പ്രഭാതത്തിൽ, പൊൻവെയിലെത്തിടുന്നൂ

പുതുദിനം തന്നുടെ ശോണിമ കണ്ടിതാ
പറവകൾ പാടുന്നു കളനിസ്വനം
പിറവി തൻ സന്തോഷമുൾക്കൊണ്ടു മാനസം
പല പല സ്വപ്ന സായൂജ്യമാർന്നൂ🌓