🥃ലഹരി മാടി വിളിയ്ക്കുമ്പോൾ🍷

രചന : കൃഷ്ണമോഹൻ കെ പി ✍

ഇഞ്ചിഞ്ചായ് മരിയ്ക്കണോ
കൊഞ്ചു പോൽച്ചുരുളണോ
പഞ്ചാര കൂടീട്ടുള്ള അസുഖങ്ങൾ വരുത്തണോ
എങ്കിലെൻ ഗൃഹത്തിൻ്റെ വാതിലു തുറന്നെത്തൂ
എന്നും ഞാൻ നിനക്കായി കാത്തിരിക്കുന്നൂസഖേ
ഉള്ളതു പറയട്ടേ, ഞാൻ നുര പതയുന്ന
തുള്ളലു വരുത്തുന്ന വിഭ്രമം തന്നെ, പ്രിയാ
ലഹരിയെന്നെനിയ്ക്കു പേർ എന്നെ പ്രാപിക്കുന്ന,
ലക്ഷങ്ങൾ കുടിയ്ക്കുന്നൂ കണ്ണുനീർ ദിനം ദിനം
ഇല്ലില്ല പരമാർത്ഥമറിയാത്ത ഇക്കൂട്ടർ തൻ
ഉള്ളിലുള്ളവയവമൊക്കെയും വാടീടുന്നൂ
കാലമെത്താതെയുള്ള, മരണത്തിൻ ചിറകടി
കാത്തു കാത്തിരിക്കുന്നൂ ലഹരി തൻ മറയ്ക്കുള്ളിൽ
പുത്തൻ തലമുറകൾ തൻ പ്രിയപ്പെട്ട പദാർത്ഥമായ്
പുത്തനായിറങ്ങുന്നു ഞാൻ പല വിധ രൂപം പൂണ്ട്
ഒന്നങ്ങു തുടങ്ങിയാലൊരിക്കലും വിടാതുള്ള
ഓമനയായിത്തീരും, ഞാൻ തന്നെ ലഹരിയായ്
പാടവമുള്ളോരെന്നെ മാറ്റിനിർത്തിയാൽ നന്ന്
ഭാവിയെ സ്നേഹിക്കുന്നോർ ലഹരിയെ വെറുത്തീടും..
എന്നുടെ സാമീപ്യത്താൽ അലിഞ്ഞലിഞ്ഞില്ലാതാകും
എല്ലാ സദ്ഗുണങ്ങളും കാലങ്ങൾ പോകെപ്പോകെ….