🌜ഒരു നബി വാക്യദർശനം🌛

രചന : കൃഷ്ണമോഹൻ കെ പി ✍

മുത്തു നബിയ്ക്കു മുന്നിൽ
മുട്ടുകുത്തി നമിച്ചപ്പോൾ
മൊത്തമങ്ങുമനസ്സതിൽ അറിവുണർന്നൂ
യത്തീമെക്കാണുന്നേരം, പുഞ്ചിരിച്ചവനെത്തൻ
ചിത്തത്തിൽ പ്രതിഷ്ഠിയ്ക്കാൻ പറഞ്ഞു നബി
യത്തീമിൻകൈ പിടിച്ചു കൊണ്ടന്നങ്ങിരുത്തിയാ
അത്താഴമൂട്ടുന്നവൻ ഉത്തമനാകും
അള്ളാവിൻ ശിഷ്യന്മാരിൽ ഏറ്റവും മഹിതനാ
അൻപുള്ള മനുഷ്യനെന്നവനോതുന്നൂ
ഭൂമിയിൽ ജനിച്ചുള്ള മനുഷ്യരായവരെല്ലാം
ഭ്രാതാക്കളെന്നു തന്നെ നബി ചൊല്ലുന്നൂ
ഭാരങ്ങളൊഴിവാക്കാൻ നിന്നുടെ സഹോദരൻ
ഭാഷണമൊഴിവാക്കി നയിച്ചിടുന്നൂ
കാലത്തിൻ പ്രവാഹത്തിൽ സാഹോദര്യത്തെ നിങ്ങൾ
കാണാതെ വരല്ലെയെന്നരുളിടുന്നൂ
കാണാത്ത ദൈവത്തിന്നെ കണ്മുന്നിൽ കണാനായി
കാത്തു വച്ചീടുന്നു നിൻ ദുരിതങ്ങളെ
ചില്ലിൻ്റെമേടകളിൽ ഇരുന്നൊരു മനുഷ്യനേം
കല്ലെറിയല്ലേയെന്നും പറഞ്ഞൂ നബി
കല്ലെടുത്തെറിഞ്ഞീടിൽ, ആ കല്ലുപതിയവേ
നിന്റെ മുഖത്തേയ്ക്കങ്ങു പതിയ്ക്കുമെന്നും ….
ഉത്തമനായ നബിയതുചൊന്നതെന്റെ
ചിത്തത്തിൽ വളരുന്നൂ വളരുവോളം
പത്തരമാറ്റാം തവ ശാസന കേട്ടു ഞാനെൻ
വ്യർഥമാം ജന്മത്തിന്നു കുളിരേറ്റുന്നൂ
ഭാവുകം പറകയും, കേൾക്കയുമല്ലാ നിന്റെ
കേവല കർത്തവ്യങ്ങൾ നിറവേറ്റുവാൻ
ആ മഹാൻ ചൊന്ന നല്ല, വചനങ്ങൾ കേട്ടീടുമ്പോൾ
മാമകഹൃദയവും കോരിത്തരിപ്പൂ ……!!🌝