🗾ഉല്ക്കാമഴകണ്ട് ഉണർന്നെഴുന്നേൽക്കുമ്പോൾ🗾

രചന : കൃഷ്ണമോഹൻ കെ പി ✍

പന്തുവരാളിയോ, കാംബോജിയോ, അതോ
ഇന്ദീവരം തീർത്ത ഉന്മാദമോ,
പന്തലുയർത്തുന്നു മനതാരിതിൽ
സംഗീത സാന്ദ്രമാം, സന്ധ്യയൊന്നിൽ
നീലവാനത്തിലെ മേഘങ്ങൾ തൻ
നീലാംബരിയുടെ താളത്തിലാ
നിദ്രാവിഹീനയാം രാത്രി തൻ്റെ
നിർമ്മല സ്വപ്നങ്ങൾ മുന്നിലെത്തീ
രാവിൻ്റെ സുന്ദരരാഗവേദി
രാകാ..ശശിമുഖൻ കൈയൊഴിഞ്ഞു,
രാവിൻ്റെ യാതനാവേളയൊന്നിൽ
ഉല്ക്കാ.. പതനങ്ങൾ കാഴ്ച്ചയായീ
രണ്ടര നാഴികനേരമതിൽ കൊള്ളിമീൻ മിന്നി മറഞ്ഞു വെന്നാൽ
രാഗാർദ്ര മാനസം പൂവണിഞ്ഞോ..
രാവിൻ മണിമാല കണ്ടു നില്ക്കേ
ഉൾവെളിച്ചത്തിന്നുപരിയായി
ഉൾക്കാമ്പിൽ ഊഷരതല്പമേകീ
ഉത്തരമേകാതെ നിന്നിടുന്നോ
ഊർജ്ജ രഹിതമാം മാനസങ്ങൾ
ഇല്ലറിയില്ലയെൻ വായനയിൽ
ഏകാന്ത ദു:ഖങ്ങൾ കണ്ടുവെന്നാൽ
ഉൾക്കുളിരേകും നിമിഷങ്ങളും
ഉണ്ടായിരുന്നതും ഓർത്തു പോയീ
ഉല്ക്കയും ഉന്മത്ത ഭാവങ്ങളും
ഉച്ചത്തിലെത്തില്ലയെന്നുമെന്നും
അന്തരീക്ഷത്തിൻ്റെ ഘർഷണത്താൽ …,
അല്പായുസ്സായി കരിഞ്ഞു പോകും
എങ്കിലും തപ്തയാം മേഘ ഭൂവിൽ
നർത്തനം നിങ്ങൾ നടത്തിടുമ്പോൾ
എന്മനമൊന്നു തുടിച്ചു പോയീ
ഭൂപാള രാഗം ശ്രവിയ്ക്കുവാനായ്🌾