🌹മഹാത്മാ 🌹

രചന : പിറവം തോംസൺ ✍

മഹാത്മജി,
അങ്ങ് ഞങ്ങളോട് ഉപദേശിച്ചത് സ്വയം പ്രവർത്തിച്ചു കാണിച്ച സത്യ പാലൻ.
എന്റെ ജീവിതമാണ് എന്റെ സന്ദേശമെന്ന് അഭിമാന പൂർവ്വം പ്രഖ്യാപിച്ച സ്ഫടിക സുതാര്യൻ.
സ്വന്തം ജീവിതത്തെ സത്യാന്വേഷണ പരീക്ഷണമാക്കി തീർത്ത സത്യാന്വേഷി.
സ്വന്തം രാജ്യത്തിന്റെ ചക്രവർത്തി പദം അങ്ങേക്കായി കാത്തു നിന്നപ്പോൾ
ചോരച്ചാലുകളൊഴുകിയ നൗഖലിയിലൂടെ അനുരജ്ഞനത്തിന് വേണ്ടി നഗ്നപാദനായലഞ്ഞ നിസ്വാർഥൻ.
സ്വന്തം കുടുംബത്തിന്റെ പോലും നീരസം ഏറ്റു വാങ്ങി നിന്നെപ്പോലെ തന്നെ നിന്റെ അയൽക്കാരനെയും സ്നേഹിച്ച സ്നേഹ സാകല്യം. ബാപ്പുജി!
അങ്ങയുടെ രാജ്യത്ത് സ്വാതന്ത്ര്യവും മനുഷ്യാവകാശങ്ങളും ചവിട്ടി മെതിക്കപ്പെട്ട
ആ അധിനിവേശ ക്കാലത്തു,
അജ്ഞതയും അന്ധവിശ്വാസങ്ങളും,
ഉച്ചനീചത്തങ്ങളും ജാതി സ്പർദ്ധയും,
അടിമത്തവും അതിക്രമങ്ങളും,
കൊടുംപട്ടിണിയും ദാരിദ്ര്യവും
നാട്ടുനടപ്പായിരുന്ന ആ മലമ്പനിക്കാലത്ത്,
പൊള്ളുന്ന ജീവിത യാഥാർഥ്യങ്ങൾ തൊട്ടറിഞ്ഞ സാത്വികൻ,സനാതനൻ!
രഘുപതി രാഘവ രാജാറാം
പതീത പാവന സീതാറാം എന്നു ഭക്തിപൂർവ്വം
ഭജിച്ചു കൊണ്ടു തന്നെ
ഹിന്ദുവിനെയും മുസൽമാനെയും ക്രിസ്ത്യാനിയെയും
ഒറ്റചരടിൽ കോർത്തിണക്കിയ
മഹാമാന്ത്രികൻ.
പട്ടിണിപ്പാവങ്ങളായ ആ കോടാനുകോടികളെ,
അനുസരണയുള്ളവരായി പിന്നിൽ അണി നിരത്തി,
അങ്ങ് സ്വയം നെയ്തെടുത്ത തോർത്തുമുണ്ട് ആയുധമാക്കി,
അഹിംസാ മന്ത്രം ഉരുക്കഴിച്ചു, പടക്കള ത്തിലിറങ്ങി,
സൂര്യൻ അസ്‌തമിക്കാത്ത സാമ്രാജ്യത്തെ ഇരുട്ടിലാഴ്ത്തി, അടിയറവു പറയിച്ച
പകരക്കാരൻ ഇല്ലാത്ത പടത്തലവൻ.
മഹാവറുതികളുടെയും
കൊടിയ പീഡനങ്ങളുടെയും
ചുടു മരുഭൂമികളും ചുടലക്കാടുകളും താണ്ടി
സ്വന്തം ജനതയെ സ്വാതന്ത്ര്യത്തിന്റെ പുഷ്‌കല പുലരിയിലേക്ക് ആനയിച്ചു,
അധികാരത്തിന്റെയും അവകാശങ്ങളുടെയും
ഏറ്റവും പിന്നണിയിൽ പോയി നിന്ന നിഷ്കാമ കർമ്മി.
വിശക്കുന്നവന്റെ മുന്നിൽ
ഈശ്വരൻ അപ്പമായി പ്രത്യക്ഷപ്പെടുമെന്നു കണ്ടെത്തി,
ശ്രീ കോവിലുകളുടെ ഇരുൾ തിങ്ങിയ സങ്കീർണതകളിൽ നിന്നും
സാധാരണക്കാരന്റെ ഹൃദയ ലാളിത്യത്തിലേക്ക്
ഈശ്വരനെ മാറ്റി പ്രതിഷ്ഠിച്ച പെരിയതന്ത്രി.
ഇന്നിപ്പോൾ,
അതിരില്ലാത്ത സ്വാതന്ത്ര്യവും മനുഷ്യാവകാശങ്ങളും
അമിത ഭക്ഷണവും ആസ്വദിച്ചു,
അജീർണ്ണ രോഗികളായി അതിസ്തൗല്യം ബാധിച്ച ന്യൂജൻ ബുദ്ധിജീവികൾ
തുരുതുരെ കീഴ്ശ്വാസം വിട്ട്,അങ്ങയെ വിമർശിക്കുന്നു!
” ഗാന്ധിയോ, അയാൾ പച്ചവെള്ളമല്ല, ടോയ്ലറ്റ് പേപ്പർ ആണ് ശൗചത്തിനു ഉപയോഗിക്കേണ്ടിയിരുന്നത് “എന്നു പരിഹസിച്ചു സ്വീകരണമുറിയുടെ ശീതള ഛായയിലിരുന്നു, മറുഭാഷയിൽ ഫേസ്ബുക്കുന്നു!….
ഇതു കേട്ടുകേട്ട് സഹികെട്ടു,
തെരുവിലുറങ്ങി, വിശപ്പും ദാരിദ്ര്യവും അടിമത്തവും പീഡനങ്ങളും കൊണ്ടു പൊറുതി മുട്ടി സ്വാതന്ത്ര്യത്തിനായ് ജീവൻ ഹോമിച്ച,
അങ്ങയുടെ പട്ടിണിപ്പാവങ്ങളായ കോടിക്കണക്കിനു പടയാളികൾ,ആ രക്തസാക്ഷികൾ,
അവരുടെ ചിതസ്ഥലികളിൽ കിടന്നു ഇങ്ങനെ അലറും :
“ഹേ,അൽപ്പബുദ്ധികളേ, നിർത്തു, നിങ്ങടെ വായ്നാറ്റമുള്ള ജല്പനങ്ങൾ! നിങ്ങൾക്കറിയുമോ അദ്ദേഹം ആരായിരുന്നെന്ന്.?”
“അദ്ദേഹം ഞങ്ങളായിരുന്നു, ഞങ്ങൾ ! നിസ്വരും നിരാലം ബരുമായിരുന്ന , ഉണ്ണാനും ഉടുക്കാനും ഇല്ലാത്ത, എഴുത്തും വായനയും അറിയാത്ത ഇന്ത്യയിലെ ജനകോടികൾ “!….
മഹാത്മജി, അങ്ങ് ഞങ്ങളുടെ കളക്റ്റീവ് കോൺഷ്യൻസ്!
കാലം ഞങ്ങൾക്കെഴുതി തന്ന വിലയുറ്റ മാനുഷിക മൂല്യങ്ങളുടെ തീയതിയിടാത്ത പേചെക്ക്!
ബാപ്പുജി,
ഇക്കാലത്തെ അങ്ങയുടെ അനുയായികൾ,
അർത്ഥമറിയാതെ മന്ത്ര മുരുവിടുന്ന പൂജാരികളെ പ്പോലെ
ശരിക്കും അങ്ങെന്തന്നറിയാത്ത,
വെറും ആനയെക്കണ്ട കുരുടന്മാർ!
ആണ്ടിൽ രണ്ടു ദിനം മാത്രം ഗാന്ധിതൊപ്പിയണിഞ്ഞു ഗാന്ധിയന്മാരാവുന്ന ആണ്ടു നേർച്ചക്കാർ!
കൊലയാളി തന്നെ കൊല്ലപ്പെട്ടവന്റെ ചരമ പ്രസംഗം നടത്തുന്ന തമാശയും ഞങ്ങൾ കാണുന്നു….
ബാപ്പുജി,
ഒരു ഹാക്കർക്കും ഭേദിക്കാനാവാത്ത, ഞങ്ങളുടെ മഹാ പൈതൃകങ്ങൾ സൂക്ഷിക്കുന്ന നിധി പേടകത്തിന്റെ
അതി സുരക്ഷിത പാസ്സ് വേർഡ് അങ്ങ് മാത്രമെന്നു ഞങ്ങൾ തിരിച്ചറിയുന്നു.
ഞങ്ങൾക്കങ്ങ്, ഒരു കാലത്തും സിലബസ് നവീകരണം വേണ്ടാത്ത
പാഠപുസ്തകമാവുന്നു…..
ഞങ്ങളുടെ കാലത്തെ സൃഷ്‌ടിച്ച കർമ്മസാക്ഷി,
അങ്ങെന്തിനു ഇന്നത്തെ കരിങ്കാലന്മാരെ പേടിക്കണം?
കാലാതിശായിയായ അങ്ങയുടെ മുമ്പിൽ കാലം എന്നും കൈകൂപ്പി നിൽക്കും.!
സത്യ, സ്നേഹ, സാഹോദര്യങ്ങളേ,നിങ്ങളെ ഞാൻ,
മോഹൻദാസ് കരംചന്ദ്
ഗാന്ധിയെന്നു വിളിച്ചോട്ടെ!🙏🙏🙏