🌷 പരദേശി 🌷

രചന : ബേബി മാത്യു അടിമാലി✍

പരദേശിയായൊരു പക്ഷിയിന്നെന്തമ്മേ
പാറിപ്പറക്കുന്നു വാനിലൂടെ
പക്ഷികൾക്കില്ലുണ്ണി നാടും നഗരവും
ദേശവും രാജ്യ വ്യത്യാസങ്ങളും
പല നാടു കാണുവാൻ പലതും പഠിക്കുവാൻ
പതിവായ് പറക്കുന്നു പക്ഷികള്
നമ്മൾക്കുമിത്തരം ചിറകുകൾ കിട്ടിയാൽ
ഒത്തിരി ദേശങ്ങൾ കണ്ടു പറക്കുവാൻ
കഴിയുമോ അമ്മേ നമുക്കു പാരിൽ
ഇല്ലുണ്ണിയത്തരം മോഹങ്ങൾ പാടില്ല
മർത്യരാം നമ്മൾക്ക് ഈ ഭൂമിയിൽ
ദേശങ്ങളൊക്കെയും അതിരുകൾ തീർത്തങ്ങ്
വേർതിരിച്ചിട്ടുണ്ടു ദേശഭക്തർ
അതിരിന്റെയപ്പുറം പരദേശിയാണു നാം
അവിടുള്ള മർത്യർക്കു നമ്മളന്യർ
അതിരുകളില്ലാത്ത ലോകമൊരുദിനം
വന്നാൽ പറന്നിടും അന്നു നമ്മൾ
എത്ര വിദൂരമാണാ സ്വപ്നമെങ്കിലും
ഒരു നാളു യാഥാർത്ഥ്യമായി മാറും
അന്നു പറന്നിടാം എന്നുണ്ണിയോടൊത്ത്
ദേശമാം ദേശങ്ങളിലൊക്കെയും