👑നീലക്കാർവർണ്ണാ നിനപ്പു നിന്നെ👑

രചന : കൃഷ്ണ മോഹൻ കെ പി ✍

നീലാംബരിയുടെ നീല നിറമാണോ
കാദംബരിയുടെ കാർവർണ്ണമോ,..
കണ്ണനെക്കാണുമ്പോളെന്നും ഉയരുന്ന
സംശയമാണിതു പീതാംബരാ
നീല നിശീഥിനി തന്നിൽ നീയേകയാം
രാധയോടൊത്തു കഴിഞ്ഞപ്പൊഴും
ചുംബന.. മില്ല, പരിരംഭണമില്ല
ചുമ്മാതെ രാഗങ്ങൾ പങ്കിട്ടു നീ
ഓടക്കുഴലിൻ്റെ, ആത്മാവിൽ നീ ചേർത്ത
ശ്രീരാഗം എന്നുമേ കേട്ടീടുവാൻ
ഒന്നല്ലൊരായിരം വർഷങ്ങൾ കാതോർത്തു
നില്ക്കുന്നു ഈ ഭൂമി ധന്യയാകാൻ
ഓങ്കാരമല്ല, പ്രണവവുമല്ലത്
ഓർമ്മയിൽക്കിട്ടുന്ന ഭാഗ്യമത്രേ
മേഘമല്ലാറല്ല, അമൃതവർഷിണിയല്ല
തേങ്ങും പ്രണയത്തിൻ രാധയല്ലേ
ഓടക്കുഴൽ വിളി നാദത്തെക്കേട്ടിട്ട്
ഓടി വന്നീടുന്ന ഗോപികമാർ
ഓരോരോ മാനസതല്പങ്ങൾ തീർത്തതും
ഓമനക്കണ്ണാ,നിനക്കു വേണ്ടി
ഉണ്ണായിവാര്യരും, മേല്പത്തൂരും പിന്നെ
പൂന്താനവും വില്വമംഗലവും
പാടിപ്പുകഴ്ത്തി നിൻ ഓടക്കുഴലിലെ
പൂന്തേൻ കിനിയുന്ന വാദനത്തെ
ഉല്പലനേത്രനാം നിൻപാദാരവിന്ദങ്ങൾ
ഉൾത്താരിൽ ഞാനും നിനച്ചു പോയീ🌹