നാടൻ പാട്ട്

Sep 15, 2023

തെയ്യക്കം തെയ്യക്കം താരോ
തക തെയ്യാരം തെയ്യാരം താരോ
തെയ്യക്കം തെയ്യക്കം താരോ
തക തെയ്യാരം തെയ്യാരം താരോ

കുപ്പിവള കണ്ടോഡ്യേ പെണ്ണെ
കരിമണി മാലകണ്ടോ
കരിമണി മാല തന്നറ്റത്തു തൂങ്ങണ
ചുട്ടിമണികൾ കണ്ടോ

കാതിലോല കണ്ടോഡ്യേ പെണ്ണെ
മൂക്കുത്തി ചേല് കണ്ടോ
മൂക്കുത്തി ചേലിന്റെയറ്റത്തു
മിന്നണ വെള്ളാരങ്കല്ല് കണ്ടോ

ആലില വയറിന്മേലെ മിന്നും
പൊന്നാരഞ്ഞാണം കണ്ടോ
പൊന്നാരഞ്ഞാണത്തിൻ വെട്ടമടിച്ചിട്ട്
നിൻ കണ്ണടഞ്ഞുപോയോ

പാദസരം കണ്ടോഡ്യേ പെണ്ണെ
മുത്തു മണികൾ കണ്ടോ
മുത്തു മണികൾ തൻ കിന്നാരം കേട്ടിട്ട്
പെണ്ണെ നീ ചാഞ്ചാടിയോ

കണ്ണുകൾ മഞ്ഞളിച്ചോഡ്യേ പെണ്ണെ
പെണ്ണിന്റെയാട്ടം കണ്ടു
പനങ്കുല മുടിയുടെ ചുരുളിലെ
മുല്ലപ്പൂ നിന്നോട് പുഞ്ചിരിച്ചോ

ചെഞ്ചോടി കണ്ടോഡ്യേ പെണ്ണെ
രുധിര സമാനമാകും
തത്തമ്മ പെണ്ണിന്റെ ചുണ്ട് ചുവന്നാൽ
ചിത്തത്തിൽ നൃത്തം വരും

കണ്ണിണ കണ്ടോഡ്യേ പെണ്ണെ
കണ്ണേറു കിട്ടിക്കാണും
കൂവള മിഴികളിൽ തെളിയുന്ന പെണ്ണിന്റെ
അനുരാഗം പാട്ടിലാക്കും

ഒരു വേള ഭയന്നുപോയോഡ്യേ പെണ്ണെ
രൗദ്രമാം ഭാവം കണ്ടു
നവരസഭാവങ്ങൾ മിന്നി മറയണ
പെണ്ണിന്റെ വശ്യ മുഖം….