💞 വിരഹം 💕

രചന : പിറവം തോംസൺ ✍

സുസ്മിതേ, നിന്നെ നിർവൃതയാക്കിയ
വിസ്മയപ്പൂനിലാവെങ്ങു പോയി?
നിർമ്മലേ, നിന്നെ നീലാമ്പലാക്കിയ
നിസ്തുല നീല നിലാവെങ്ങു പോയി?
ഓടക്കുഴലൂതി, മാരിവില്ലാക്കും
കോടക്കാർവർണനിന്നെവിടെപ്പോയി?
മഞ്ജീര ശിഞ്ജിത മഞ്ജു മന്ത്രണം,
കാഞ്ചനക്കിങ്ങിണി മന്ദ്ര മധുരം,
മഞ്ഞപ്പട്ടണിഞ്ഞ മുഗ്ധ മന്ദഹാസം,
മുദ്രക്കൈ,യിവയൊക്കെയെങ്ങുപോയി
സുസ്മിതേ, നിന്നെ വിശ്രുതയാക്കിയ
സുസ്മേരപ്പൂനിലാവെങ്ങു പോയി?
മായയെല്ലാമെന്നു മാളോരറിയാൻ
മായാമയനെങ്ങോ മറഞ്ഞതാകാം!
നീലക്കുറിഞ്ഞികൾ പൂക്കുന്ന മേട്ടിൽ
നീരദ പാളിയായ് ചൂഴുന്നുണ്ടാകാം
നീൾമിഴിയാളിൻ കടമിഴിക്കോണിൽ
നീലിമയായവൻ വാഴുന്നുണ്ടാകും
മനസ്സിൻ മണിച്ചെപ്പിൽ പ്രേമലോലൻ
മധുരക്കിനാവായൊളിച്ചിരിക്കാം
എപ്പോ,ളെവിടെ,യെങ്ങനെയെന്നതു
മുപ്പാരും വാഴുന്ന ദേവ സങ്കൽപം!
കാത്തിരിക്കാനല്ലോ യാത്രിക്കു യോഗം
യാത്രികർ നമ്മൾ സഹിക്ക വിയോഗം!
സുസ്മിതേ, നിന്നെ നിർവൃതയാക്കിയ
മാസ്മരപ്പൂനിലാവെങ്ങു പോയി?….