🌹 ചരിത്രം തിരുത്തിയ സത്യാന്വേഷി 🌹

ലേഖനം : ബേബി മാത്യു അടിമാലി✍

ഒരു വശത്ത് ജീവിതം സന്ദേശമാക്കുകയും മറുവശത്ത് ആ സന്ദേശം ജീവിതമാക്കുകയും അതിനെ കാലം കൊണ്ട് അടയാളപ്പെടുത്തുകയും ചെയ്ത അദ്ഭുത പ്രതിഭാസമാണ് ഗാന്ധിജീ . ആ ഒരർത്ഥത്തിൽ അദ്ദേഹത്തിന്റെ മരണം പോലും ഒരു വലിയ സന്ദേശമായിരുന്നു. ഈവിധം ഗാന്ധിജീ നൽകിയ സന്ദേശങ്ങളിലാണ് ഇന്ന് ലോകം പ്രതീക്ഷയോടെ ഉറ്റുനോക്കുന്നത്.

സമാധാനത്തിനു വേണ്ടി പരസ്പര സഹവർത്തിത്വത്തോടെ ജീവിക്കാൻ, അനീതിക്കെതിരെ അക്രമരാഹിത്യത്തിലൂടെ പോരാടാൻ ഗാന്ധിയൻ ദർശനങ്ങളാണ് ഉത്തമം എന്ന് ഇന്ന് ലോകം തിരിച്ചറിയുന്നു.

ഗാന്ധിജിയുടെ വസ്ത്രം പോലും ഒരു രാഷ്ട്രീയ സന്ദേശമായിരുന്നു. ലോകത്തിലെ മുഴുവൻ ദരിദ്ര ജനവിഭാഗങ്ങളുടെയും ജീവിതത്തിന്റെ അടയാളപ്പെടുത്തൽ . വസ്ത്രത്തിലൂടെ അവരെ അദ്ദേഹം പ്രതിനിധീകരിക്കുകയായിരുന്നു. അവരെ ലോകത്തിനു മുന്നിൽ പുനഃപ്രതിഷ്ഠിക്കുകയായിരുന്നു. ഇതിലൂടെ അദ്ദേഹം തത്വദീക്ഷിതയില്ലാത്ത നാഗരികതയ്ക്കും വൈദേശിക അധിപത്യത്തിനും എതിരെയുള്ള പ്രതിരോധമാണ് അവതരിപ്പിച്ചത്. ഇതിലൂടെ തന്റെ ജനതയെ ഒരുമിപ്പിക്കാനും സ്വാതന്ത്ര്യത്തിന്റെ അനന്ത വിഹായസിലേക്ക് അവരെ കൈപിടിച്ചുയർത്താനും അദ്ദേഹത്തിനു കഴിഞ്ഞു. എന്നാൽ ഇന്ന് ഗാന്ധിജീ തുറന്നെതിർത്ത നാഗരികത വിശ്വരൂപംപൂണ്ടു നിൽക്കുന്നു ,

മൂല്യങ്ങളുടെ സ്ഥാനത്ത് മുതലിനെ പ്രതീഷ്ഠിക്കുകയും ഉപഭോഗ സംസ്ക്കാരത്തിൽ അഭിരമിക്കുകയും ചെയ്യുന്ന ജനതയായി നമ്മൾ മാറി. ഇതു സൃഷ്ടിച്ചതാകട്ടെ സാമൂഹിക സംഘർഷങ്ങളും കൊടിയ അസമത്വങ്ങളും .

ഈ ദുരവസ്ഥ തരണം ചെയ്യാൻ ഗാന്ധിയൻ ദർശനങ്ങളായ സത്യവും സമത്വവും സാഹോദര്യവും അഹിംസയും അക്രമരാഹിത്യവും ജീവമന്ത്രങ്ങളാക്കി ഒരുമയോടെ മുന്നേറുവാൻ പ്രതിജ്ഞാബദ്ധരാവുക എന്നുള്ളതാണ് ഈ ഗാന്ധിജയന്തി ദിനം നമുക്കു നൽകുന്ന മഹത്തായ സന്ദേശം.
ഗാന്ധിജയന്തി ദിനാശംസകളോടെ……🙏🙏🙏🌹🌹🌹🌹🌹🌹