🌹 മറന്നുപോയ കവിത🌹

രചന : ബേബി മാത്യു അടിമാലി ✍

നിദ്രതൻ നീലിമ ആഞ്ഞാഞ്ഞു പുൽകവേ
സ്വപ്നത്തിലെത്തിയ കാവ്യാങ്കനേ
പുലരുംവരേയെന്റെ ഹൃദയത്തിൽ സൂക്ഷിച്ച
പ്രണയവർണ്ണത്തിന്റെ മാധുര്യമേ
നിദ്രവിട്ടുണരവേ എവിടേയ്ക്കുപോയി നീ
എന്തിനെന്നുള്ളിന്റെ പടിയിറങ്ങി
സ്വപ്നമായെന്നിൽ
പിറവിയെടുത്ത നീ
എന്തിനായുള്ളിൽ നിറച്ചു മോഹം
എവിടെനീ മാഞ്ഞുപോയെന്നു ചൊല്ലീടുമോ
പരിഭവമെന്തിനാണെന്നു ചൊല്ലൂ
തുലിക തുമ്പിൽ പിറക്കാതെപോയൊരു
ദു:ഖമായുള്ളിൽ നിറഞ്ഞുനീയും
ഒരു വട്ടമെങ്കിലും തിരികെവന്നീടുമോ
പുനർജ്ജനിച്ചീടുമോയെന്റെയുള്ളിൽ
അത്രമേൽ നിന്നെ ഞാൻ പ്രണയിച്ചുപോയെന്റെ
സ്വപ്നസഞ്ചാരിയാം സൗന്ദര്യമേ