👚 അവർ നഗ്നരാണ്👕

രചന : കൃഷ്ണമോഹൻ കെ പി ✍

നാഗരീകത്തിന്റെ നാൾവഴിയുൾക്കൊള്ളുന്ന
നാരിയും നരനുമീലോകത്തിൽ നഗ്നരാണ്
നാരായത്തുമ്പിലുള്ള അക്ഷരം ഗ്രഹിക്കാതെ
നാട്യങ്ങൾ നടത്തുന്ന ഏവരും നഗ്നരത്രേ
അടിയുടുപ്പിടാതെയീ കൂട്ടത്തിൽ സംവദിപ്പോർ
അരങ്ങിലല്ലെങ്കിൽ പോലും മനസ്സിൽ നഗ്നരത്രേ
ആലങ്കാരികമായി വസ്ത്രങ്ങളണിഞ്ഞെത്തും
ആശയവിഹീനരും നഗ്നത പേറീടുന്നു
ആനയ്ക്കു കൗപീനത്തെ അണിയിക്കാൻ ശ്രമിക്കുവോർ
ആലയം മറക്കുന്നു ആരവം മുഴക്കുന്നൂ
ആശയറ്റുളവായ വൈകാരികത്വത്തിന്റെ
ആവേശമുൾക്കൊള്ളുവോർ, അവരും നഗ്നരായി
നല്ലതു ചൊല്ലുന്നേരം പൊല്ലാത്ത വചനങ്ങൾ
നിർമ്മമത്വത്തോടെ ചൊല്ലും, അവരും നഗ്നരായി
ആനന്ദിക്കുവാനുള്ള നിമിഷങ്ങളെ മെല്ലെ
ആട്ടിയങ്ങകറ്റുന്ന മണ്ടന്മാർ നഗ്നരത്രേ
ആവൃതരാകാം സ്വയം, വിജ്ഞാനലത തന്റെ
ആദ്യാക്ഷര മൊട്ടു വിരിയിച്ചു മലരാകാം🪡