🌹 ഗാസയുടെ രോദനം 🌹

രചന : ബേബി മാത്യു അടിമാലി✍

ഗാസാമുനമ്പിൽനിന്നുയരുന്ന രോദനം
ലോകത്തെയാഴ്ത്തുന്നു കണ്ണുനീരിൽ
അവിടെനിന്നുയരുന്ന കാറ്റിനുപോലും
മനുഷ്യരക്തത്തിന്റെ ഗന്ധമുണ്ട്
മദമിളകിയാടുന്ന യുദ്ധവെറിയിൽ
ചാമ്പലായീടുന്നു മനുഷ്യത്വവും
എത്രയോ നിസ്വരാം മാനവർതന്നുടെ
കണ്ണുനീർ വീഴ്ത്തിയീ യുദ്ധഭൂവിൽ
മത തീവ്രവാദവും വംശവെറികളും
ഏത്രയോ കാലമായ് തുടരുന്നിവർ
അരുതെന്നു പറയേണ്ട ലോക നേതക്കളും
പക്ഷം പിടിക്കുന്നു ഇരുഭാഗമായ്
പാലായനങ്ങളും കൂട്ടക്കുരുതിയും
മാത്രമാണീ യുദ്ധ ബാക്കിപത്രം
മതമല്ല മതമല്ല മനുഷ്യത്വമാണീ
മാനവർക്കാവശ്യമെന്നറിയു
കണ്ണുനീരുപ്പിനും വിശക്കും വയറിനും
മതമേതുമില്ലന്നതറിയുകനാം
അരുതെന്നു പറയുവാൻ
ആർജ്ജവം കാട്ടണം
അക്രമം കാട്ടുന്നവർക്കെതിരെ
ഇനിയുമീ യുദ്ധം തുടർന്നാലതു സർവ്വ
നാശമാണെന്നതും അറിയണംനാം.