🙏ഗാസയുടെ നൊമ്പരം ഇസ്രയേലിന്റെയും🙏

ലേഖനം : ബേബി മാത്യു അടിമാലി ✍

പശ്ചിമേഷ്യയിൽ നിന്നും ഉയരുന്ന വെടിയൊച്ചകളും ഇസ്രയേലിലിൽ നിന്നും ഗാസയിൽ നിന്നും കേൾക്കുന്ന നിരപരാധികളുടെ ദീനരോദനങ്ങളും മാനവികയിലും മനുഷ്യത്വത്തിലും വിശ്വസിക്കുന്ന എല്ലാവരുടെയും ഹൃദയ നൊമ്പരമായി മാറുന്ന ദിനങ്ങളിലൂടെയാണ് മാനവരാശി കടന്നുപോകുന്നത്.

നൂറ്റാണ്ടുകളോളം ഉടമകളായിരുന്നവർ ഒരു സുപ്രഭാതത്തിൽ അടിമകളായി മാറുന്നു. 1948 യഹൂദർ ഇസ്രയേൽ എന്ന പേരിൽ ഒരു രാജ്യം നിർമ്മിച്ച് പാലസ്തീനിൽ അധിനിവേശം നടത്തുന്നു. അന്നു തുടങ്ങിയതാണ് പശ്ചിമേഷ്യയിലെ അസംതൃപ്തിയും സംഘർഷങ്ങളും . യഹൂദർ പാലസ്തീനിലുള്ള , അവിടെ നൂറ്റാണ്ടുകളായി താമസിച്ചു കൊണ്ടിരുന്ന മനുഷ്യരെ അടിമകളാക്കുന്നു , അവരെ തല്ലിയോടിക്കുന്നു. ശക്തൻ ദുർബലനുമേൽ നടത്തുന്ന ഭീകരമായ കടന്നുകയറ്റം. അതിനു പറയുന്ന ന്യായം പണ്ട് ഈജീപ്റ്റിൽ നിന്നും രക്ഷനേടാൻ യഹോവ തങ്ങൾക്കു നൽകിയ വാഗ്ദത്ത ഭൂമിയാണത്രെ ഇസ്രയേൽ , എന്തൊരു ന്യായം?

സ്വന്തം ജീവനും ജീവിതത്തിനും വേണ്ടി പാലസ്തീനികൾ എത്രയോ കരഞ്ഞു , കേണു അതൊന്നും പരിഗണിക്കാൻ ആരും അന്ന് തയ്യാറായില്ല. കാരണം അധികാരവും സമ്പത്തും എന്നും ഇസ്രയേൽ പക്ഷത്തായിരുന്നു. അതിനാൽ അവർ ചെയ്യുന്ന എന്തും നീതീകരിക്കത്തക്കതായി.

എങ്കിലും ഹമാസ് നിരപരാധികളുടെമേൽ നടത്തിയ ക്രൂരമായ ഇപ്പൊഴത്തെ അക്രമണം ഈ ഘട്ടത്തിൽ ഒരിക്കലും ന്യായികരിക്കുവാൻ കഴിയുകയുമില്ല. ഏന്നാൽ അതുപോലെ തന്നെ എതിർക്കപ്പെടേണ്ടതാണ് ഇസ്രയേൽ നടത്തുന്ന മനുഷ്യത്വരഹിതമായ അധിനിവേശങ്ങളും . ഇസ്രയേൽ ജനതയ്ക്കുള്ളതു പോലെ തന്നെ മനുഷ്യാവകാശങ്ങൾ പാലസ്തീൻ ജനതയ്ക്കുമുണ്ട് . അത് മനസിലാക്കിയാൽ ഈ പ്രശ്നം ശാശ്വതമായി പരിഹരിക്കപ്പെടും.

മതവും വിശ്വാസങ്ങളുമല്ല മനുഷ്യത്വമാണ് വലുത് എന്ന് ലോകം തിരിച്ചറിയണം. തങ്ങളെപ്പോലെ അപരനും ഈ മണ്ണിൽ ജീവിക്കാൻ അവകാശമുണ്ട് എന്ന് എല്ലാവരും മനസിലാക്കണം.
എല്ലാ മതങ്ങളും സമാധാനമാണ് മുന്നോട്ടു വെയ്ക്കുന്ന ആശയം .
അത് പ്രവർത്തിയിലും കാണിക്കാനുള്ള ആർജ്ജവം അവർ കാട്ടണം . ഇരു വിഭാഗങ്ങളിലുംപെട്ട സാധാരണക്കാരായ മനുഷ്യരാണ് ഇതിന്റെയൊക്കെ യഥാർത്ഥ ബലിയാടുകൾ എന്ന് തിരിച്ചറിയണം.

യുദ്ധം എത്രയും വേഗം അവസാനിപ്പിക്കുകയും സമാധാന ചർച്ചകളിലൂടെ നീതി പൂർവ്വമായ പരിഹാരം ഇരു വിഭാഗങ്ങൾക്കും കിട്ടുന്ന തരത്തിൽ പ്രശ്നം പരിഹരിക്കുവാൻ യു എൻ അടക്കമുള്ള സംഘടനകളും ലോക രാജ്യങ്ങളും ശ്രമിക്കുകയും അതിന് നേതൃത്വം കൊടുക്കുകയും വേണം. ഇവിടെ പക്ഷം പിടിക്കലുകൾ പ്രശ്നം സങ്കീർണ്ണമാക്കുകയാണ് ചെയ്യുന്നത് എന്ന് നമ്മൾ തിരിച്ചറിയണം.
ഗാസയിലായാലും ഇസ്രയേലിലയാലും നിരപരാധികളുടെ കണ്ണുനീരും ചോരയും വീഴാതിരിക്കട്ടെ .

കാരണം വിശപ്പും കണ്ണുനീരും ഇറ്റുവീഴുന്ന ചോരയും അത് എല്ലാവർക്കും എല്ലായിടത്തും ഒരു പോലെയാണ് അതിന് മതമോ, ജാതി, ദേശ വിത്യാസങ്ങളോ ഇല്ല എന്ന് എല്ലാവരും തിരിച്ചറിയണം. സമാധാനത്തിന്റെ വെളുത്ത പുക പശ്ചിമേഷ്യയിൽ നിന്നും ഉയരും എന്ന പ്രതീക്ഷയോടെ …..🙏🙏🙏