🌹🙏 പുതു പുഞ്ചിരിയോടെ ഉണരുന്നു കേരളം🙏🌹

രചന : കൃഷ്ണമോഹൻ കെ പി ✍

പുതു വർഷം ആഗതമായിയീ, കേരള
പുണ്യഭൂമിയ്ക്കൊരു പുതുഹർഷമായ്
പുഷ്പാഞ്ജലികളോടേറ്റു വരവേല്ക്കാം
പുഷ്പാവൃതയായ മാതാവിനെ

പല പല ജാതി വിജാതികൾ പേറുന്ന
പല പല രാഷ്ട്രീയക്കോമരങ്ങൾ
പലനാൾ ശ്രമിച്ചിട്ടും, പതറാതെ മുന്നേറും
പവിത്രയത്രേ, ഈ ജനനിയെന്നും

പുലരിയുണർത്തുവാൻ സഹ്യാദ്രിയുണ്ടവൾ
പുണരും സമുദ്രത്തെ, സന്ധ്യയിങ്കൽ
പുനരൊരു ചിന്തനം മനസ്സിന്നതേകുവാൻ
പുഞ്ചിരി തൂകിത്തിളങ്ങി നില്പൂ

പരമൊരു സംസ്ഥാനമാകിലും, ഭാരത
പുലരൊളി സ്വാംശീകരിച്ചിടുമ്പോൾ
പതിതർ തൻ ദു:ഖങ്ങളുൾത്താരിലേറ്റിടും
പൂജ്യയായ് മേവുന്നു എന്റെ ദേശം

പഴമയും പുതുമയും കൈകോർത്തു നില്ക്കുമീ
പുണ്യഭൂവിൽ, ഞാൻ ജനിച്ചതിനാൽ
പരിഭവമില്ലാതെ കഴിയുന്നു എന്നുമേ
പരിഭാഷ വേണോ ഈ കേരളത്തിൽ?!

പാരമ്യതയുടെ സീമയിൽ ചെന്നെത്തി
പാർക്കയാണീ ഭൂവിൽ നമ്മളെല്ലാം
പാലമൃതൂട്ടുമീ കേരളമാതാവിൻ
പിറന്നാൾ ദിനത്തിലായ് ആശംസകൾ
✍️🙏