🛖ഓർത്തിടാംവഴിയമ്പലം🛖

രചന : കൃഷ്ണമോഹൻ കെ പി ✍

മന്വന്തരങ്ങളായ് വാനത്തിൻ പഥങ്ങളിൽ
സഞ്ചാരം നടത്തുന്ന ജീവൻ്റെ കണികകൾ
മന്നിടം തന്നിലെത്തി ദേഹത്തെ പുണരുമ്പോൾ
ദേഹമോ ആത്മാവിൻ്റെ വഴിയമ്പലമാകും

നിത്യദു:ഖങ്ങൾ തൻ്റെ മാറാപ്പും ചുമന്നിതാ
അത്താണി തേടിപ്പോകും മനുഷ്യൻ്റെ വഴികളിൽ
സത്യത്തിലെത്തീടുന്നു സ്വസ്ഥതയുളവാക്കും
മൃദുഭാഷണമായി വഴിയമ്പലം സഖേ

ഭൗതികശരീരമീ ഭൂമിതൻ മടിത്തട്ടിൽ
കാഴ്ചകൾ കാണാനായി രഥ്യയിലലയുമ്പോൾ
സന്തോഷ സന്താപങ്ങൾക്കുറങ്ങാൻ തുറക്കുന്ന
ചിന്തതൻ കൂടാരമായ് വഴിയമ്പലം മാറും

ഇവ്വിധം രചനകൾ കാടുകൾ കേറും നേരം
ഇക്കണ്ട ജഗത്തിലെ പാതയോരത്തിൽ കാണും
ഇത്തിരിവെട്ടം നോക്കി ഗമിച്ചീടുകിൽ മെല്ലെ
പ്രാന്തത്തിൽ മരുവുന്ന വഴിയമ്പലം കാണാം

ജീവിതാന്ത്യത്തിൽ കയ്യിൽപേറുന്ന പാഥേയമാം
പുണ്യപാപങ്ങൾ ഭുജി-ച്ചാശകളൊഴിവാക്കി
ഇന്നലെയുറങ്ങിയതല്പത്തെ വിട്ടിട്ടൊരു
യാത്രയങ്ങാരംഭിക്കാം, വഴിയമ്പലം തേടി🎪