🥚കാലത്തിൻ ശബ്ദത്തെ കാതോർത്തിടുമ്പോൾ🥚

രചന : കൃഷ്ണമോഹൻ കെ പി ✍

കാളിമയാരേ.. പടർത്തിയീ വാനത്ത്
കാർമേഘമോ, അതോ, ശോകങ്ങളോ…
കാർനീലവർണ്ണമായ്, ആകാശമാകവേ…
കാർകൂന്തൽ മെല്ലേയഴിച്ചിട്ടതോ
കാവ്യസുരഭിയാം, വാഗ്ദേവി തന്നുടെ
കണ്ണുകൾ പയ്യെയടച്ചതാണോ?!
കാലികപ്രാധാന്യമുള്ള വിഷയങ്ങൾ
കാവ്യ കർത്താക്കൾ മറന്നതാണോ…
കാര്യമെന്തായാലും, ചിന്താസമുദ്രത്തിൽ
കാകോളം വന്നു പതിച്ച പോലേ
കാമ്യവചനങ്ങൾ പാടേ മറന്നിതാ
കാലൻ, പതുക്കെച്ചിരിച്ചു നില്പൂ
കാത്തു നിന്നോർത്തൂ,മറുപടി കിട്ടുവാൻ
കാലത്തിന്നുത്തരം, കേൾപ്പതില്ലാ…
കാതരചിത്തരേ, മാനുഷ ജന്മമേ
കാലം പതുക്കെക്കണക്കുതീർപ്പൂ
കാരിരുമ്പൊക്കും കരളതു പേറുവോർ
കാലാന്തരത്തിൽ മറഞ്ഞു പോകും
കാമ്യവചനങ്ങൾ കാതിൽപ്പതിയ്ക്കുമ്പോൾ
കാണുന്നു നാമെല്ലാം സ്വപ്ന ലോകം🦉