🥀സന്ധ്യയ്ക്കൊരു സാഗരതീരത്ത്🥀

രചന : കൃഷ്ണമോഹൻ കെ പി ✍

സാന്ധ്യ സ്വപ്നങ്ങൾ തൻ നിർവൃതിയിൽ
സായന്തനം, തുടുപ്പേന്തി നില്ക്കേ
സാഗരം തന്നിൽ കുളിച്ചൊരുങ്ങാൻ
സാമോദം സൂര്യൻ നിനച്ചിടുമ്പോൾ

ശൃംഗാരലോല വസുന്ധരയോ
ശങ്കര ധ്യാനത്തിലാഴ്ന്നു നിന്നൂ
പൂർവാംബരത്തിലുദിച്ചിടുന്നൂ
പൂനിലാവേകുവാൻ ചന്ദ്രബിംബം

ചേക്കേറും കൊക്കിൻ കലപിലയാൽ
ചേലൊത്ത മാമര ശാഖകളിൽ
സാഗരഗീതത്തിൻ മാറ്റൊലികൾ
സാരസ രാഗമായ് മാറിടുന്നൂ

സംഗീത സന്ധ്യയ്ക്കു മാറ്റുകൂട്ടാൻ
വിൺമേഘജാലങ്ങൾ വർണ്ണാഭമായ്,
സ്വർണ്ണാംബരത്തെ ഞൊറിഞ്ഞുടുത്ത്
അർണ്ണവം തന്നിൽ മുഴുകി അർക്കൻ

തന്മനോ ദേവൻ്റെ വേർപാടിലാ
തന്വംഗി ഭൂമി തപിച്ചു നില്ക്കേ
ഉൾത്താരിലെത്തീ മൃദു മന്ത്രണം
“ഉത്തമേ നാളെയണയുമീ ഞാൻ”

സൂര്യൻ്റെ വാക്കിൽ മതിമറന്നൂ
സാഗരതീരത്തെ ശയ്യ തന്നിൽ
സമ്മോഹിതയായ ഭൂമി മെല്ലെ
സ്വപ്നങ്ങൾ കാണാൻ മിഴിയടച്ചൂ…..🦉