🌹 കാലമെന്ന രണ്ടക്ഷരം 🌹

രചന : ബേബി മാത്യു അടിമാലി ✍

എന്താണ് കാലം ? കാലം നമ്മുടെ ജീവിതത്തിൽ എപ്രകാരമാണ് ഇടപെടുന്നത് ?
കാലം നമ്മളിൽ പ്രവർത്തിക്കുന്നതെങ്ങനെയാണ്.? കലാത്തിന്റെ കണക്കു പുസ്തകത്തിൽ എഴുതപ്പെടാത്തതൊന്നും മനുഷ്യ ജീവിതത്തിൽ ഇല്ല .
ചിലപ്പോൾ മന്ദമാരുതനെപ്പോലെ തൊട്ടുതലോടി മറ്റ് ചിലപ്പോൾ കാട്ടുതിയേപ്പോലെ ഉണക്കികരിച്ച് കടന്നുപോകുന്ന മഹാത്ഭുതത്തിന്റെ പേരാണ് കാലം. കാലത്തെ പോലെ അമ്പരിപ്പിക്കുന്ന കൗതുകമുണർത്തുന്ന വിസ്മയിപ്പിക്കുന്ന മറ്റൊന്നും ഭൂമിയിലില്ല.

ചിലപ്പോൾ കാലം നമ്മെ വേദനയുടെ ആഴക്കടലിലേക്ക് വലിച്ചെറിയുന്നു. മറ്റ് ചിലപ്പോൾ നനവാർന്ന കൈവിരൽ കൊണ്ട് കോരിയെടുത്ത് ആശ്വസിപ്പിക്കുന്നു. മറ്റു ചിലപ്പോൾ നമ്മുടെ എല്ലാത്തരം നൊമ്പരങ്ങളുടേയും മൂർച്ച കൂട്ടി കടന്നുപോകുന്നു.
ശരിക്കും കാലം സ്പർശിക്കാത്ത ഒരു മനുഷ്യ ബന്ധവും നമ്മുടെ ജീവിതത്തിൽ ഇല്ല . കാലം വലിച്ചെറിയുകയോ ചേർത്ത പിടിക്കുകയോ ചെയ്യുന്ന ചെറു ജീവികൾ മാത്രമാണ് മനുഷ്യർ.

ഒരു കാലത്ത് നമുക്ക് അപരിചിതരായിരുന്ന മനുഷ്യർ ചിരപരിചിതരാവുകയും നമ്മുടെ ജീവിതത്തിലെ എറ്റവും പ്രിയപ്പെട്ടവരായി മാറുകയും ചെയ്യുന്നത് കാലം നമ്മുടെ ജീവിതത്തിൽ പ്രവർത്തിക്കുന്നതു കൊണ്ടല്ലേ?

നമ്മുടെ ഓർമ്മയിൽ നമ്മുടെ ചിന്തയിൽ നമ്മുടെ ഹൃദയത്തിന്റെ താഴ്വാരങ്ങളിൽ എറ്റവും പ്രിയപ്പെട്ടവരായി ഒരുകാലത്ത് കരുതിയിരുന്ന മനുഷ്യർ മറ്റൊരു കാലത്ത് മുഖാമുഖം നോക്കാൻ പോലും പറ്റാതെ വെറുപ്പും നിരാശയും വിതരണം ചെയ്യുന്ന മനുഷ്യരായി നമുക്കരികിലൂടെ നടന്നു പോകുന്നത് നിർവികാരരായി നമുക്ക് കണ്ടു നിൽക്കാൻ സാധിക്കുന്നത് എന്തുകൊണ്ടാണ് ?

കാലം ശരിക്കും ഓർമ്മയ്ക്കും മറവിയ്ക്കുമിടയിലെ നാൽക്കവലയാണ്.
കാലം പ്രവേശിക്കാത്ത , ഇടപെടാത്ത ഒരു ജീവിതവുമില്ല.
കാലം കണക്കു തീർക്കാത്ത ഒരു മനുഷ്യ വ്യവഹാരങ്ങളും ഇല്ല . കാരണം എല്ലാ വിധ മനുഷ്യ പ്രവർത്തനങ്ങളുടെയും എക കർമ്മസാക്ഷി കാലമെന്ന രണ്ടക്ഷരം മാത്രം.